Erik Jensenip isaariaq ataaseq tamaviaarutigaa
Aatsitassanut Naalakkersuisoq Erik Jensen nunarsuarmi aatsitassarsiorneq pillugu saqqummersitsinerit annerpaartaanni Torontomi ingerlanneqartumi aatsitassarsiornermik suliaqartut ernummataannut tusarnaarsimavoq allanngortiterinerillu annertuut Kalaallit Nunaata siunissamik aningaasarsiorfeqarlualernissaanik qulakkeerinnittut tamaviaarutigerusullugit.
Torontomi PDAC-imi aatsitassarsiorneq pillugu saqqummersitsinersuarmut ingerlatsisunit 25.000-init amerlanernit peqataaffigineqarluni nunarsuarmi annerpaajusumut ulluni tallimani angalareerluni Erik Jensenip angalaneq nalilersuiffigaa qaffasissunillu anguniagassalioreersimalluni, aatsitassarsiornermik suliaqartunit illuatungiliuttunillu nuannaarutigineqartussanik.
Aviisi Sermitsiaq taama allappoq.
Aatsitassaqarneranik misissueqqissaarineq tullissaanut alloriaqqilluni aatsitassarsiornermik ingerlatsilernissamut akuersissummik pissarsiniarfiuleraangat Kalaallit Nunaanni oqartussat suliassanik arriippallaarujussuartumik suliarinnittartutut ukiorpanni avoqqaarineqartarsimapput.
Sermitsiaq aatsitassarsiornermik suliaqarfimmi tusarfinnik aningaasaliisartunillu arlalissuarnik PDAC-imi oqaloqateqarpoq, isornartorsiuinerlu assigiiaarpoq sakkortullunilu.
– Suliassanik ingerlatsisarneq sivisuallaarpoq. Kipiluttunartumik sivisusarpoq uatsinnullu koruuninik millionerpassuarnik akeqartarluni, oqartoqarpoq, Kalaallit Nunaannilu inuussutissarsiornermut naalakkersuisoqarfik, Jørn Skov Nielsenip pisortatut allaffissornikkut qullersaaffigisaa, ajornartorsiuterpiaasutut toqqaannartumik tikkuarneqarluni.
Suleqatigiinneq amigaataasoq
Sermitsiap saqqummersitsinersuarmi tusarfii paasissutissiillutik oqarput, aatsitassanut naalakkersuisoqarfiup aamma inuussutissarsiornermut naalakkersuisoqarfiup akornanni suleqatigiinneq amigaataasoq.
Sermitsiap tusarfiisa suleqatigiinnerup amigaataaneranut suna pissutaasorineraat aviisimi Sermitsiami atuarsinnaavat. Aviisi uani ataani pissarsiarisinnaavat: