Erik Jensenip assartukkanut akit qaffattut illersorai: RAL isertitaqarniarnermigut artorsarpoq
Royal Arctic Linemi aningaasaqarnerup ataqatigiinnissaanut avammut tunisassiornermik inuussutissarsiortut akiligassamik akiliitinneqarnissaa politikkikkut kissaatigineqarsimavoq. Allatut iliortoqassappat akit qaffanneqarnerisa innuttaasut tamarmik eqqorsimassagaluarpai, naalakkersuisoq Erik Jensen (S) oqarpoq. Umiarsuaatileqatigiiffik taarsigassarsinermut isumaqatigiissummini piumasaqaatinik naammassinnissinnaajunnaarnissamut aarlerinartorsiorsimasoq, taanna ilisimatitsivoq.
Royal Arctic Linep (RAL) januaarip naanerani sivikitsuinnarmik piffissaliilluni avammut assartukkanut akigititat 32 procentinik qaffammagit, aalisarnermik inuussutissarsiortunit sakkortuumik isornartorsiorneqarpoq.
Umiarsuaatileqatigiiffiup Namminersorlutik Oqartussanit pigineqartup nalunaaruteqarnerani, politikeri Jens-Frederik Nielsen (D) Naalakkersuisunut isornartorsiuerpalaartumik arlalinnik apeqquteqarpoq.
RAL isertitaqarniarnermigut ajornartorsiortoq, Naalakkersuisoq ilisimatitsivoq, aammalu ingerlatseqatigiiffiup taarsigassarsinermut isumaqatigiissutaanni piumasaqaatit unioqqutinnissaannut aarlerinartorsiorsimavoq, tamannalu isumaqatigiissutit taakku isumaqatiginninniutigeqqinneqarnerinik kinguneqarsinnaavoq. RAL-illu taarsigassarsiai qaffasinnerusumik erniaqalersinnaapput, taama naliliisoqarpoq.
Assartukkanut akit assigiinnginnerat annikillisinniaraat
Taamaammat ingerlatseqatigiiffiup isertitaqarnerata qaffannissaa pisariaqartinneqarpoq, aammattaarlu assartukkanut avannamukartunut kujammukartunullu akit assigiinngissusaasa suli annertunerulinnginnissaa kissaatigineqarsimavoq.
- Kujammut avannamullu angallannermi akit naligiinnginnerisa annikillineqarnissaat naalakkersuinikkut kissaatigineqarpoq, periarfissatut ilusiliami allammi avannamut nassiussat suli akisunerulersinneqassappata, taamaalillunilu akit assigiinngissutaat annertunerulersinneqassappat tamanna naapertuutinngimmat, Erik Jensen taama Jens-Frederik Nielsenimut (S) akissuteqarpoq.
Avannamukartunut akinik qaffaanermi innuttaasut tamarmik eqqorneqartussaagaluartut, naalakkersuisoq nangilluni allappoq.
Aalisarnermik inuussutissarsiortunit isornartorsiuineq ilaatigut Royal Greenlandimeerpoq, tassanilu pisortaagallartup Nils Kinnerupip, akit qaffanneqarnerat nunatsinnit nioqqutissat unammillersinnaassusaannut sunniuteqassasut, naggataatigullu tunisinermi akit appartinneqarsinnaammata, akiligassaq aalisartunut tutsinneqarsinnaasoq sakkortuumik isornartorsiorpaa.
Unammillersinnaanermut sunniuteqarsinnaanera paasigaa
Taamatut iliuuseqarneq unammillersinnaassusermut sunniuteqassasoq, Erik Jensenip paasisinnaavaa, kisianni Erik Jensenip oqarnera naapertorlugu inuussutissarsiortut akikillilerutinik atugassaqartinneqarsimapput:
- Akit qaffannissaat sioqqullugu inuussutissarsiortut avammut nassiussisartut pitsaalluinnartunik, akikillilerutinik taaguuteqartinneqartunik atugassaqartinneqarput. Akit qaffannerisa kingorna inuussutissarsiortut avammut nassiussartut suli pitsaalluinnartunik atugassaqartinneqarlutik sulisussaapput, Erik Jensen akivoq.
Raajarniartut arlallit pissutsit allatorluinnaq isigaat, Royal Arctic Linellu kisermaassisuunera atorunnaartikkusuppaat, avammut nassiussat namminneq isumagisinnaaniassagamikkit.
RAL-ip aammattaaq Canadami aalisarnermik suliffeqarfiit arlallit sullitarai. Taakku manna tikillugu RAL aqqutigalugu containerit 500-t missaanniittut nassiussimavaat, Canadamiullu suliffeqarfiutaat 4 millionit koruuninit akitsorteriffigineqartussanngorput.
RAL Canadamit isornartorsiuineq akissuteqarfigigaa
Tamanna pillugu Kalaallit Nunaanni usingiaannartassanerlutik RAL-ilu atuinnassanerlugu nalilersoqqinniarlugu nalunaaruteqarput.
Canadamiut suliffeqarfiutaasa nalilersuinissaq nammineq aalajangissagaat RAL isornartorsiuinermut tassunga akissuteqarpoq, kisianni RAL-ip suli unammillersinnaassuseqarnini naatsorsuutigaa:
- Niuernikkut eqqarsarluni isumaliornermi ilaatinneqassapput tulaassisinnaanissamut periarfissarititat allat atussagaanni kingunerisassai (assersuutigalugu St. John’simi 900 sømilit sinnerlugit Nuummiit ungasissusilimmiittumi), piffissaq angalanermut atugassaq (Nuummiit ullut pingasut sisamallu akornanni ass. St. John’simut aammalu ullut taakkua aalisanngitsoorfiusussat), kiisalu orsussamut assartuinissamullu, ass. Saint John’simi aningaasartuutissat, RAL tusagassiuutinut nalunaarummi allappoq.
RAL nangilluni allappoq:
- Avammut assartuinermut akigititap sipaarutissartaa allatut nalimmassarneqaqqissinnaagaluarpoq Nunatsinni atuisuusut matussusiisussanngortinneqarlutik taamaasillutik Canadamiut aalisariutaat Nunatsinni tulaasseriarlutik akikitsumik assartugassat apuuffissaannut assartorsinnaallugit.