Valg til Folketinget

Erik Jensenip Aleqa Hammond unammillerpaa

Siumumit Folketingimut qinigassanngortittoq Erik Jensen, parteeqatini aamma Folketingimut qinigassanngortittoq Aleqa Hammond unammillerpaa

Erik Jensen

- Uanga juunip 18-ani folketing-imut qinersinissamut SIUMUT tunuliaqutigalugu qinigassanngortippunga. Qinigassanngortinninnut peqqutaaqataavoq isumaqarama Siumumi allannguinissaq piffissanngortoq.

Folketingemut qinigassanngortittoq Erik Jensen, atuartartutut allakkamini taama aallarniilluni allappoq.

Taanna oqaluttuarpoq, Siumumi tulluusimaarutissaqaqalutik inuiaqatigiinnut suliat pitsaasut amerlasoorpassuit pilersissimagamikkit. Kisiannili aamma nassuerutigaa Siumut pitsaanerusinnaasorpassuarnik peqartoq.
- Taamaattumik inuiaqatigiit kalaallit qinigassikkusuppakka Siumumi qinigassamik pitsaasumik nutaamik – pakatsisikkusunnagillu. Uanga kalaallit tamarmik sinniisussaattut ajunnginnerpaatut qinigassanngortippunga. Tassami uanga tassaavunga Siumut nutaaq, Erik Jensen taama allappoq.
Imatullu nangilluni:
- Uanga qinigassani tassaassaanga arlaatigut unneqqaserlussimanngitsoq. Qinigassaq tatiginartoq maligassiuisoq Kalaallit Nunaatalu pitsaasumik ineriartornissaanik angorusutalik. Uanga timersornerup silarsuaani, peqatigiiffilerinerni kiisalu sunngiffimmi annertuumik kulturikkut suliaqarsimasimasuniit ilisimaneqarneruvunga, Erik Jensen oqarpoq.
Siumup siulersuisui ataqqivai
Sermitsiaq.AG-mut erseqqissarpaa, Aleqa Hammondip nammineq qinigassanngortinnera apeqqusernagu aammalu Siumup siulersuisuisa aalajangiussaat ataqqillugu. Kisianni erseqqissarusuppaa, Siumumiittut tamarmik ajortuliortuunngutsut.
- Erseqqissarusuppara qinersisartut tatiginartumik maligassiuisumillu qinigassaqartut, aamma Siumumimugaluartumilluunniit.
Folketingimut Siumumit qinigassanngortittup Erik Jensenip, inuit Siumut pillugu isiginnittariaasaat pigiliunneqartoq allanngortikkusuppaa assersuusiorlunilu:
- Danskit amerlasuut isumaqartarput kalaallit Danmarkimi najugaqartut tamarmik imerajuttuusut atornerluisuusullu. Maanna Siumumik oqarutta, inuit amerlasuut isumaqartarput Siumumeersut tamarmik peqquserluttuusut kusanaatsuliortullu. Tamanna uanga allanngortikkusuppara, Erik Jensen Sermitsiaq.AG-mut oqarpoq.

- Naammanngilaq nukittuujuneq, politikerivissuuneq imaluunniit oqallorissuuneq, maligassiuisuunissaq aamma pingaaruteqarpoq, Folketingimut qinigassanngortittoq Erik Jensen oqarpoq.

Namminiilivinneq asuli oqaasiinnaanngilaq
- Kalaallit Nunaata namminiilivinnissaa asuli oqaasiinnaanngilaq. Kalaallit Nunaatalu namminiilivinnissaa tassaassaaq Kalaallit Nunaata nunarsuarmioqataanerminik takutitserusunnera, taamaasillutalu aamma nammineq isumaqatiginninniarnerni peqataasalerusunnera nunatsinnut tunngassuteqartuni tamani.

- Kalaallillu Nunaata namminiilivinnissaa ornissinnaavarput, inuiaqatigiit kalaallit pituttorsimanngitsutut, aningaasatigut imminut napatissinnaasut, inuiaqatigiittut akuerisatut inissisimalerutta minnerunngitsumillu kalaaleqatitta aatsaat kissaatigippassuk.

Powered by Labrador CMS