Erik Jensenimut kaammattuut: Uummannami angallannermi pissutsit aaqqiissuteqarfigikkit

- Uummannap eqqaani qulimiguulimmik angallassineq iluarsisariaqarpoq.

Qaasuitsup Kommuniani kommunalbestyrelsimut ilaasortaq, Sakio Fleischer (S) Attaveqaqatigiinnermut Naalakkersuisoq Erik Jensenimut (S), taama ammasumik allagaqarpoq.

Sakio Flesicherip Erik Jensen kaammattorpaa, sumiiffimmi qulimiguulimmik ajornartorsiuteqarneq iluarsiinissaq pillugu Air Greenland aamma Danmarkimi Trafikstyrelseni ataatsimeeqatigissagai.

- Air Greenland nalunaaruteqarpoq taartumi qulimiguullit angallassisarnerat unitsinneqartoq. Paasinarluinnarpoq
isumannaallisaaneq salliutillugu taamatut aaliangertoqarsimappat. Kisiannili qulimiguulik kisiat isumalluutingalugu annerusumik Uummannap eqqaani kaperlannerani angalasunut assartuutaavoq. Ulluni makkunani sila unerisimanani anorlerajuppoq, qulisimatillugulu taarsiaartarluni, taamaattumillu angalaniartut annertuumik kalluarneqareerput, angalasussat Uummannamut Uummannamiillu ingerlaqqeriarsinnaanatik Qaarsuni Ilulissanilu
uninngatinneqaqattaarput, Sakio Fleischer oqarpoq.

Juullikkunnilu qanoq pisoqarsinnaanera, taassuma ernumassutigaa.

- Taanginnapajulerpat angalasussat pingaartumillu juullisioriartussat allallu angalasut annertuumik eqqungaassapput, kinguaattooqattaarnerit imaalinerani aallartereermata. Angallannermut naalakkersuisoq Erik Jensen pissutsit ilungersunarsilluinnartut aaqqiiviginiarlugit sulissuteqarnissat piaartumik kaammattuutigaara.
Ukiuni amerlaqisuni qulimiguulik annerusumik silap taarnera ajornartorsiutiginagu angalalluartarpoq, massakkulli qulimiguullik atorneqartut allanngorneqarnikuunngillat, taamaattumik danskit oqartussat oqaloqatiginissaat piaartumik sulissutiginissaa aammaarlunga kaammattuutingaara, Sakio Fleischer oqarpoq.