Erik Jensen: Danmarkip eqqaavigissanngilaatigut
Dansk Folkepartiip nunasinissamik qinnuteqarsimallutik itigartinneqarsimasut pinerlunniartartullu inissisimaffigisassaannik Kalaallit Nunaanni aallartitsisarfissamik pilersitsisoqarnissaa pillugu aalajangiiffigisassatut siunnersuutaa, Siumumi siulittaasup Erik Jensenip akerlilerpaa.
Siumumi siulittaasup Erik Jensenip Danmarkip Namminersorlutik Oqartussat isumaqatigissuteqarfigalugit Kalallit Nunaanni aallartitsisarfissamik pilersitsisoqarnissaanik siunersuut isumaqatiginngilluinnarpaa. Aallartitsisarfissaq nunasinissamik qinnuteqarsimallutik itigartinneqarsimasunut pinerlunniartartunullu nunaminnut angerlartinneqarnissamik utaqqisunut inissiffissatut siunniunneqarsimavoq.
Dansk Folkepartimi politikkikkut oqaaseqartartup Pia Kjærsgaardip aalajangiiffigisassatut siunnersuut Folketingimi oqaluuserisassanngortissimavaa, tunngavilersuummilu nassuiaatigisimallugu, aallartitsisarfiup ullumikkut Illersornissaqarfiup atortagaani Kangilinnguani inissinneqarpat Kalaallit Nunaata aningaasarsiorfigissagaa.
Dansk Folkepartiimit oqaatigineqaraluartoq, aallartitsisarfik Kalaallit Nunaanni innuttaasunut suliffissaqartitsilissasoq, Siumut siulitaasuata Erik Jensenip isumassarsiaq isumaqatiginngilluinnarpaa.
- Isumaq siunnerssuummut tunngaviusoq nuannarianngilluinnarpara. Danskit unammillernartuutaannut taamatut ikiorsiitinniarnerput isumaqatiginngilluinnarpara. Ingasappallaaqaaq, Erik Jensen oqarpoq, nangillunilu:
Eqqaaviussanngitsoq
- Nunarput danskit ajornartorsiutaannut eqqaaviussanngilaq, Siumumi siulittaasoq Naalakkersuisut siulittaasuattut issiavimmik pissaaneqarfiusumik anguniagaqarluni qineqqusaartoq erseqqissaavoq.
Danmarkimi angerlartitsisarfik Kærshovedgård najukkami pinerluuteqartoqartarneranik pilersitsisimavoq, piffissallu ilaanni pilersaarutaasimavoq, qeqertaaqqami Lindholmimi angerlartitsisarfimmik pilersitsisoqassasoq. Pilersaarulli tamatuma kingorna taamaatiinnarneqarsimavoq.
Dansk Folkeparti siusinnerusukkut Kalaallit Nunaanni angerlartitsiviliortoqarnissaanik eqqarsaateqarsimavoq, Danmarkimili naalakkersuisut siunnersuut itigartissimavaat. Pilersaarutaavoq maanna siunnersuutigineqartoq apriilip 26-ani Folketingimi oqaluuserineqassasoq.
Aamma atuaruk: DF: Aallartitsisarfik suliffinnik nutaanik pilersitsillunilu aningaasarsiorfiulissaaq