Erik Jensen: Aqqut toqqagarput malipparput
Siumut nunatsinni politikkikkut nutaamik suleqatigineqarumalinngikkaluartoq, Erik Jensenip siunnerfik toqqarsimasani allanngortissanagu, tusagassiortunut katersortitsinermi nassuiaatigaa.
IA-p nal. 13.30 tusagassiortunik katersortitsinermini Siumut suleqatigissanagu oqaatigereeralu, Siumut siulittaasuat, Erik Jensen nal. 14.00 tusagassiortunik aamma katersortitsivoq.
Erik Jensen taannaavoq partiit allat maannakkut suleqatigilerusunngisaat. Tassungalu tunngatillugu isummernini nassuiaatigisariaqalerpaa.
- Killiffik uaniippoq, politikkikkut siunnerfik ataatsimeersuarnermi toqqarsimasarput tulluusimaarutigaara. Siumumi siulittaasuunera tulluusimaarutigaara, Erik Jensen oqarpoq.
Kielsen tulliulluni alloriassaaq
Taassuma nassuiaatigaa partiinut allanut oqaloqatigiinnerit pitsaasuugaluarlutik suleqatigiinnermik angusaqarfiusimanngitsut, assammillu isaassineq tiguneqarsimanngitsoq.
- Tamanna isumaqarpoq, Naalakkersuisut Siulittaasuata alloriarneq tulleq suussanersoq aalajangertussanngormagu, Erik Jensen oqarpoq. Taamaasilluni nassuiaatigaa qinersinissamut toorsinissamut periarfissaqarani.
Pinngitsoorneqarsinnaajunnaartoq oqaatiginiarpaa: Piffissaq naatinnagu qinersineq. Toqqaannartumilli oqaatiginngilaa qinersisoqartariaqalernersoq, erseqqissaassuteqarlunili maanna ikinnerussuteqarlutik naalakkersuisoqatigiinnermik ingerlatsisoqartoq.
Erseqqissarneqarporli:
- Nualluussuup tunillaassornerata nalaani, covid-19-ip tunillaassornerata nalaani, qineqqusaartoqarnissaata pisariaqalinnginnissaa neriuutigisimagaluarparput, nassuiaavoq, aammalu oqaatigalugu maannakkut qinersisoqassagaluarpat ernumassutissaqarani.
Assagut isaassimavagut
Siulittaasup tullia Vivian Motzfeldt oqarpoq neriuuteqartoqarnissaa pisariaqartoq.
- Qinikkat inuiaqatigiinnut sullissinissamut piumassuseqartariaqarput. Assagut isaassimavagut, naaperiarfissanilu naaperiaasimagaluarluta. Innuttaasut ernumanerat, ilungersuutaat kissaataallu tusarnaarsimavagut aamma, oqarpoq.
Partiit allat oqaloqatiginerini sammisat arlallit Erik Jensenimit taakkartorneqarput, itinerusumilli oqaluttuarineqaratik. Erik Jensenip erseqqissarpaa Demokraatinut, Partii Naleqqamut, IA-mut aamma Suleqatigiissitsisunut oqaloqatigiinnerit pitsaasumik ingerlasimasut. Atassut siulittaasua Ilulissaniit Nuummut angalammat, sulilu tikinngimmat, oqaloqatiginissaanut piffissaqarsimanngilaq.
Avissaartuunneq
Siulittaasup oqaatigaa partiit allat avissaartuuttoqarneranik oqariartornerat suliassaqarnermik malitseqarsinnaasoq.
- Kisianni ilisarnaatigiuarparput ilutsinni assigiinngisitaartuugatta, assigiinngitsunillu isummersinnaasaratta. Taamaakkaluartoq pisariaqartillugu ataatsimuussuserput nassaariuarparput, oqarpoq.