Erik Jensen: Allassimanngitsutut malinneqartartoq oqaluuserineqassaaq
Apriilip arfernani Inatsisartunut qinersisoqarpat Kim Kielsen Erik Jensenimit amerlanerusunik taaguunneqarsimassappat, Siumumi nutaamik qasunartumillu pissaaneqarniuttoqaqqilersinnaavoq.
Siumumi ileqquuvoq politikkerip amerlanerpaanik taaguunneqartup isumaqatiginninniarnermut akisussaasuusarnera aamma Inatsisartunut atatillugu sunniuteqarnissamut aalajangiisuusarnera.
Erik Jensenip Sermitsiaq.AG-mut oqaaseqarnera naapertorlugu ileqqoq tamanna ingerlaannaq atuuttussatut isikkoqarpasinngilaq.
Amerlanerussuteqartunik ataqqinninneq
- Ilumoorpoq allassimanngitsumik taamatut malitaqartartugut. Qinersisartulli isumaat takoqqaarusuppara, naatsorsuutigilluinnarparali uanga partiilu qinigaalluarnissarput, Siumumi siulittaasoq nutaanik naalakkersuisooqatigiiliorniarnermini amerlanerussuteqartitsiniarnermi isumaqatigiissuteqanngitsoorami Kim Kielsenimik Naalakkersuisut Siulittaasuattut uppisitsinngitsoortoq oqarpoq.
Siumumut qinersisartut Kim Kielsen inuttut amerlanerpaanik taaguupassuk tamannna ataqqinianngiliuk?
- Soorunami qinersisartut ataqqivakka, allassimanngitsutulli ileqqorisartagarput eqqarsaatigalugu tamanna qinersineq naammassippat partiitta iluani oqaluuserisariaqarparput, Erik Jensen erseqqissaavoq oqaatigalugulu apeqqut isumaannarsuutaasoq.
Siulittaasutut atuuffik oqallisissaanngitsoq
Erik Jensenip erseqqissaatigaa, qinersinermi inernerit aamma inuttut taaguunneqarnerit agguataarsimaneri qanorluunniit ikkaluarpara, ukiut pingasut qaangiuppata Siumup nuna tamakkerlugu ataatsimeersuarnissaata tungaanut partiimi siulittaasuusussaalluni.
- Qinersineq qanorluunniit inerneqaraluarpat partiimi siulittaasutut suliassakka ingerlattussaavakka. Inuttut taaguunneqarnerit qinersisoqareerpat oqaluuserissavavut. Qinersisartut siulliullutik oqaaseqarnissaat ataqqisariaqarparput, Siumumi siulittaasoq oqarpoq.
Erik Jensenip erseqqissaatigaa, kingullertigut qinersisoqartarnerani partiimut taasisartut ikiliartornerisa illuanut saatsinneqarnissaa partiimi anguniagaasoq.
- Aap, taamatut ingerlasoqarnera illuanut saatissavarput, qularinngilaralu taamaaliorsinnaalluta, Erik Jensen oqarpoq.