Erik Jensen tunoqqutaarisoqarsinnaanera pillugu: Nalorninartoqarnera inooqataaffigisariaqarpara
Siumumi politikerit qitiusumik inissisimasut septembarimi ullut sisamat atorlugit isumasiussavaat partii qanoq iliorluni naalakkersuutitaqarnermut uteqqissinnaanersoq. Partiip siulittaasuata Erik Jensenip ilaatigut eqqartortinniarpaa qanoq iliorluni suliat inunnut tunngasut pitsaanngitsut pinngitsoorneqarsinnaanersut.
- Innuttaasut Siumumit tatiginninnerat uterteqqinniarlugu annertuumik suliassaqarpugut, Siumup siulittaasua Erik Jensen AG-mit apersorneqarluni oqarpoq, tassani politikikkut sammisassat oqaluuserineqarnissaannut ingerlavissaq qanoq ittuunersoq qulaarpaa.
Aviisimit AG-mit apersorneqarami taama oqarpoq.
Kisianni siullermik sammilaariartigit suliat inunnut tunngasut ilaatigut taakkununnga ilaapput maannakkut partimi siulitaasut aamma siornatigut siulittaasuusimasup Kim Kielsenip unamminerat. Aap, qanoq qulakkeerneqarsinnaava suliat inunnut tunngasut tusagassiuutit qulequtsiuttagaannut ilaavallaarunnaarnissaat, tamakkumi qinersisartut politikerinik nuannarinninnginnerannik kinguneqarsinnaammata?
Terlinganeerineq
- Uannut ajornartorujussuuvoq qulakkiissallugu partiimi uagutsitut angitigisumi aamma marlunnut avissaartuuffiusimasumi, suliat inunnut tunngasut nutaat pinngitsoorneqarsinnaannginnerat.
Aap, ilisimanngilara ullumikkut arlaata terlinganiinniarlunga sulilluni partiip iluani aallartereersimanersoq. Atugassarititaasoq tamanna nalorninartoqarnera inooqataaffigineqartariaqarpoq, kisianni uanga sapinngisara tamaat atorlugu isumaginiarpara innuttaasut uagutsinnik tatiginninnerisa pilerseqqinneqarnissaat, Erik Jensen erseqqissaavoq.
Nassuerutigaa partiip tusaamaneqarnera qineqqusaarnerup nalaani annertuumik mangiarneqartoq, taamaattumillu partiip siulitaasuata anguniarpaa Siumumi malittarisassat allanngortinneqarnissaat, taamaalillutik Inatsisartunut aamma kommuninut qineqqusaartussat siusinnerusukkut pillaatisisimanerit pillugit partiip aqutsisuinut ilisimatitsitsissutigiinnarnagit, taamatuttaaq pinerluttulerinermut inatsit tunngavigalugu piffissami tassani akuutinneqarnerlutik ilisimatitsissutigisassagaat.
Aviisimi AG-mi atuarnerusinnaavutit: