mittarfiit
Erik Jensen: Tasiilami Mittarfissaq upperilluinnarparput
Naak Tasiilami mittarfissap aningaasalersorneqarnissaa suli inissinneqarsimanngikkaluartoq, piviusunngortinneqarumaartoq Attaveqatigiinnermut Naalakkersuisup qularinngilaa.
Attaveqatigiinnermut Naalakkersuisutut, Erik Jensenip (S), Tasiilami mittarfiliortitsinissaq piumaartoq, innuttaasuinut qulakkeerinnissutigerusuppaa.
- Tasiilami illoqarfinnilu allani mittarfiliortitsinissap qulakkeerneqarnissaa Naalakkersuisut pimoorullugu sulissutigaa, taanna Sermitsiaq.AG-mut oqarpoq.
Aamma atuaruk:
Pilersaarummit sukkanerusoq
Tunumilu 'illoqarfiit pingaarnersaannut' nuannersumik tusagassaqartitsivoq. Pilersaarummi ingerlalluartoq, taanna qularnaveeqqusiivoq.
- Tasiilami mittarfiliornissaq pilersaarutigisimasatsinnit sukkanerusumik pissaaq. Misissueqqaarnernit ukioq manna naammassineqarnissaat Naalakkersuisut naatsorsuutigaat, kingornalu suliniutigineqartoq ukiup tulliani aallartinneqarsinnaassalluni, Erik Jenseni (S) oqarpoq.
Aningaasammi
Mittarfik sumi inissisimanissaanut qanorli sanaartorneqassanersoq misissorneqassapput. Pilersaarutilli kikkunnit aningaasalersorneqarnissaa politikkerinit ujartorneqassaaq
- Pilersaarutilli aningaasalersorneqarnissaanut apeqqut pingaarnerpaavoq. Tassani aningaasaqarnermut inatsissamut isumaqatiginninniarnissamut qilanaarpunga, naggataanimi mittarfissap qanoq aningaasalersorneqarnissaat aalajagiiffigineqassammat, attaveqatigiinnermut naalakkersuisoq oqarpoq.
Aamma atuaruk:
Naalakkersuisulli aningaasalersuinissamut qanoq takorluugaqarnersut, maanna paasissutissiarerusunngilaa.
Naalakkersuisut atorniarnissamut periarfissaqarput aammalu allaneersunik aningaasaleerusussinnaasunik ujartuisinnaallutik.
Allannguutit pilersaarutit aarlerinartorsiortitsisinnaasut
Sapaatip akunnerata siuliani Tasiilami mittarfissaq Kalaallit Airportsip ataanut inissinneqarnissaa Justus Hansenip (D) siunnersuutigaa, taamaaliornikkut pilersaarummut aninigaasaliisussat nassaarineqarsinnaassammata.
Tassunga Erik Jenseni (S) mianersoqqusivoq.
- Naalakkersuisut isumaqanngillat, Tasiilami mittarfiliornissaq naalakkersuisoqarfimmit Kalaallit Airporstimut nuunneqassasoq. Kalaallit Airportsip suliassaanik allanngortitserinissaq atorniartarfinnut kingunerluuteqarsinnaanera Naalakkersuisut ernumassutigaat.
- Naggataani mittarfiliornissat tamarmik aarlerinartorsioratarsinnaapput.
Taasilami mittarfiup iluaqutissartai
Apeqqutaalerporli Tasiilami mittarfissaq aallaqqaammulli sooq Kalaallit Airportsip ataanut inissinneqarsimannginnersoq. Assartuinermummi isumalioqatigiissitaasimasup 2011-mi isumaliuutissatut tikkuarsimavaa mittarfiup Kulusumiit Tasiilamut nuunneqarpat inuiaqatigiinnut iluaqutissartai.
Tunumi takornariaqarnikkut annertuumik ineriartortinneqarsinnaasut isumalioqatigiissitap immikkut tikkuarsimavai.
- Kalaallit Airporstip aallartinneqarneqarni Tasiilaq ilanngunneqarsimannginneranut pissutaavoq, Nuummi Ilulissanilu pilersaarutit siulliusimammata. Tassani aamma Qaqortumi mittarfissaq siulliunerulaarsimavoq, Erik Jensen (S) nassuiaavoq.
Upperilluinnaraa
Kisianni Tasiilami pilersaarut maanna sukkanerusumik alloriarfigineqalerpoq.
- Tasiilami mittarfissap piviusunngornissaa Naalakkersuisut upperilluinnarpaat. Attaveqatigiinnerup inuiaqatigiinnut pitsaanerpaamik nukittorsarneqarnissaa, Nunatsinnut pingaaruteqarluinnarpoq, Erik Jensen (S) naqissusiivoq.