Erik Jensen siulittaasoqarfimmit inissinneqarpoq
Aalisarnermut naalakkersuisup Erik Jensenip tatiginassusaa unammillerneqarpoq. Inuussutissarsiuteqartunut sulialinnut oqaloqateqarnermini oqaatigaa aalisarnermut inatsisissaq Inatsisartut ukiaanerani ataatsimiinneranni saqqummiunneqassasoq, Sermitsiaq.AG-ip paasisai naapertorlugit tamaatut pisoqassanngilaq
Naalakkersuisut ukioq kingulleq aalisarnermut inatsisissatut siunnersuutigisimasaat Inatsisartut ukiaanerani ataatsimiinnermi siunnersuutigineqassasoq Erik Jensenip Sulisitsisunut KNAPK-mullu ataatsimeeqateqarnermini oqariartuutigaa.
Kisianni Sermitsiaq.AG-ip paasisai naapertorlugit taama pisoqassanngilaq.
Aalajangiineq
Qinersinerup siuliani Naalakkersuisooqatigiit aalisarnermut inatsisissatut siunnersuutissaraluat, qinersisoqarnera pissutigalugu siunnersuut tunuartiinnarneqartoq, allanngornagu Inatsisartut ukiaanerani ataatsimiinneranni siunnersuutigineqassasoq Erik Jensen oqaloqateqarnermini oqaatigaa. Naalakkersuisulli siunnersuut Inatsisartut Siulittaasoqarfiannut tallimanngornermi aggustip 24-ani nalunaaqutaq 12.00 sioqqullugu siunnersuut tunniutinngilaat.
Siunnersuut killiliussaq qaangerlugu tunniunneqarpat Inatsisartuni Siulittaasoqarfiup immikkut ittumik akuersaarsinnaavaa. Inatsisartuni Siulittaasoqarfiup aalisarnermut inatsisissaq kingusinaarluni tunniunneqartoq Inatsisartuni siunnersuutigineqartussatut akuerineqassanngitsoq Siulittaasoqarfik aalajangerpoq, tamanna sapaatip akunnerata siuliani aalajangiunneqarsimasoq aalajangerneqarpoq.
Tamanna Naalakkersuisooqatigiinnut eqquivoq.
Sooq Inatsisartut Siulittaasoqarfiata itigartissimaneraa ilisimaneqanngilaq. Siunnersuummi tusarniaasoqarsimannginnera pissutaalluni itigartinneqarsimasoq Sermitsiaq.AG-ip paasivaa. Siunnersuut aamma aalisarnermut ataatsimiititaliaq peqataatinneqarsimanngilaq.
- Inatsisartut siunnersuummik taamaattumik saqqummiiffigineqarsinnaanngillat, suliarmi imaannaanngilaq pingaaruteqartuullunilu.
Navialisitsissutaasinnaasoq
KNAPK-ip aamma Sulisitsisut paasiuminaatsippaat siunnersuut allannguuteqartinnagu inatsisissatut siunnersuut saqqummiunneqassasoq.
- Inatsisartunut kaammattuutigiumavarput Naalakkersuisut inatsimmik suliarititsiniarnera itigarteqqullugu, pisariaqartumik sioqqutsisumik suliarisariaqartut naammassineqarnissaasa tungaanut. Allatut iliorniarnerit tamarmik Kalaallit Nunaata siunissaanik navialisitsissutaasinnaasumik pinnguarinninnerussapput, Sulisitsisuni pisortaq Brian Buus Pedersen oqarpoq.
Naalakkersuisut Inatsisartullu nuna tamakkerlugu isumaqatigineqartumik aaliangiinissaq angujumallugu oqaloqatigiillutillu suleqatigiinnissaat kaammattuutigineqarpoq.
Taamaattumik Erik Jensenip siunnersuut pillugu isumaliutigisinnaasani aappaagumut utaqqisinnaalerpai, siusinnerpaamik siunnersuut qaqinneqarsinnaavoq Inatsisartut upernaanerani ataatsimiinneranni 2019-mi.