Erik Jensen Naalakkersuisunut akerliliisoq
Naalakkersuisut illersuisoqarfiit kommissionimi nutaami ataatsimoortikkusuppaat, tamannali isumassarsialatsiaanngitsoq Siumumi siulittaasup Erik Jensenip oqaatigaa.
Siumumi siulittaasunngorlaap Erik Jensenip Naalakkersuisut akerlilerlugit nalunaarutigaa, inuit pisinnaatitaaffii pillugit ataatsimiititaliaq kissaatigineqartoq.
Ataatsimiitialiami illersuisoqarfiit atuutereersut, soorlu Meeqqat Illersuisuat, Inuit Innarluutillit Illersuisuat, Utoqqaat Illersuisuat, Naligiissitaanermut siunnersuisoqatigiit Inuillu Pisinnaatitaaffiinut Siunnersuisoqatigiit kattunniarneqarput. Ataatsimiititaliami nutaami illersuisunut taarsiullugit kommissærit tallimat ilaasortarineqassapput.
Ataatsimiititaliarsualiorniarnerli allaffiup qaaginnaani suliaavoq, kimilluunniit ujartorneqarnikuunngitsoq, Erik Jensen Siumup nittartagaatigut ilanngussamini oqarpoq:
- Pingasunik illersuisoqarneq ingerlalluartoq kattutsinneqarnissaannik isumassarsiaq suminngaanniit pinngorsimanersoq takujuminaappoq, tamatumanilu Nunatsinni inuit pisinnaatitaaffiisa ataatsimiitsitaliaata ataanut inissinniarneqarpoq. Piviusunngussappallu naatsorsuutigineqassaaq qulaaniit aqutsisineq eqititerinerlu pingaartinneqarnerulissammat.
Ulluinnarni aqutsisut siunnersuummut akerliusut
- Tamannalu isumassarsiaq Siumumit aallaaveqanngilaq soorlu aamma Naalakkersuisooqatigiit Siumut, Nunatta Qitornai Demokraatillu isumaqatigiissutaanni taamatut siunnerfeqarniarneq allassimagani, Siumup siulittaasua Erik Jensen oqarpoq.
Ilanngutassiami atuarneqarsinnaavoq, Siumut ulluinnarni aqutsisui isumaqartut, pisinnaatitaaffiit pillugit suliniaqatigiiffiit allanngortoqaratik ingerlaannartariaqartut.
- Isumaginninnermut Naalakkersuisup Martha Abelsenip aammalu Peqqissutsimut Naalakkersuisup Anna Wangenheimip maanna ukiup naalernerani oqaluuserisassanngortitaannut Siumumiit naammagisimaarinninnginnerput apuupparput, ilanngutassiami allassimavoq.
Erik Jensenip ilaatigut oqaatigaa, utoqqaat illersuisuat ukioq ataaseq qaanngiussimalersoq aatsaat pilersinneqartoq, takunnissinnaaninilu naapertorlugu, utoqqaat illersuisuata sulilluni aallarnisaaleruttornerani tunngaviinik allanngortitsisoqarniarnera pissusissamisuunngitsoq.
Jensen: Ilumoortumik illersuisunik soraatsitsineruvoq
- Siunnersuutaat ilumoortumik sulisutsialappassuarnik soraarsitsineruvoq. Suliaat isaterneqalerput, minnerunngitsumillu qitiusumiik aqutsiniarnermik aallaavilimmik atuutsitsiniaanerullutik. Imatullu isumaqartinniarneqarlutik; suut tamarmik kattunneqarpata aatsaat Naalakkersuisunut pitsaanerusumik siunnersuisoqarsinnaalissasut.
- Inuiaqatigiit qanimut oqartussaanerat maanna illersuisoqarnermi nukittoqqutigineqartoq peerniarneqarpoq, eqiterutsitsinikkut innuttaasut oqartussanut ungasinnerulernerannik kinguneqartussamik, Erik Jensen Siumup nittartagaatigut ilanngutassiigami oqarpoq.
Peqqissutsimut Naalakkersuisup Anna Wangenheimip pisinnaatitaaffinnik suliaqarnerup kattutsinneqarnea iluaqutaassasoq siusinnerusukkut oqaatiginikuuaa:
- Taamaalilluni assesuutigalugu suiaassutsimut, upperisarsiornermut immikkut inuiaassutsimut tunngassuteqartut ukkatarineqarsinnaalissapput. Suliassap kattunneqarneratigut sulinermi eqaatsumik sulisoqarsinnaanera sulinerullu nukittunerulersinneqarsinnaanera pilersissavavut, Anna Wangenheim kattussiniarneq pillugu siusinnerusukkut taamatut oqaaseqarsimavoq.