Erik Jensen IA-mik isumaqatiginninniartoq
Nunami partiit illuatungiliuttut annersaat IA Siumumi siulittaasumit Erik Jensenimit pisortatigoortumik ataatsimeeqatigineqaqqaarnissamut qaaqquneqarsimavoq. Taamaalilluni Erik Jensenimit nalilerneqarsimarpasippoq, Demokraatit nutaamik naalakkersuisooqatigiittut isumaqatigiissusiorfigineqarsinnaanngitsut.
Demokraatit ataasinngormat ullaap tungaani Erik Jensenimik ataatsimeeqateqarsimapput, tamannali sioqqullugu IA ataatsimeeqatiserineqarluni Erik Jensenimit qaaqquneqarsimavoq, Erik Jensenip Demokraatinik isumqatigiissuteqarsinnaanini upperimagunanngilaa, tassani innuttaasut takusinnaammassuk Siumumi politikkikkut nutaamik siunnerfeqartoqalersimasoq.
IA-mi siulittaasup Múte B. Egedep Sermitsiaq.AG-mut uppernarsarpaa, nammineq politikkikkullu siulittaasup tullia Aqqaluaq B. Egede pisortatigoortumik ataatsimmeqatigiinnermi siullermi ataatsimeeqataasimallutik, IA ullumi ataasinngornermi aqqanernut Erik Jensenimit ataatsimeeqatiserineqarsimavoq.
Minutisaluit matuma siornatigut Demokraatit aqqanernut tusagassiortunitk katersuutsitsinissamut qaaqqusisimapput, tassani naalakkersuisoqatigiinnimi nutaamik isumaqatigiissuteqarnissap isumaqatiginninniutigineqarneranik ilisimatitsiniarlutik.
Piumasaqaat avaqqunneqarsinnaanngitsoq
- Siumumi aqutsisut nutaat politikkiminnik saqqummiussinissaannaat pillugu ataatsimiigiarnissaq pitsaasuunngilaq, Múte B. Egede erseqqissaavoq.
IA naalakkersuisooqatigiinnut ilanngutissappat aalajangiisuulluinanrtut marluk inissinneqartariaqarput.
- Avaqqunneqarsinnaanngitsumik piumasaraarput Kuannersuarni aatsitassarsiorniarnerup unitsinneqarnissaa, IA-mi siulittaasoq erseqqissaavoq.
Partii illuatungiliuttuusoq naalakkersuisooqataalissappat Naalakkersuisutut akissaassuseqarneq IA-mi siulittaasup pingaartinnuinnagaata ilagaa.
Avissaartuuttoqarnera unitsinneqassasoq
- Pingaaruteqarpoq Siumumi avissaartuuttoqarnerata aaqqiiffigineqarnissaa. Eqqissiveqanngitsumik ingerlatsisumi suleqataarusunngilavut, soorlu maanna partiimi taamatut ingerlasoqarnera qangali takusimagipput. Innuttaasummi politikkikkut patajaattumik atugassaqartitsisoqarnissaa ujartorpaat, taakkuuppullu politikkikkut avissaartuuttoqarneranut pissaaneqarniuttoqarneranullu sanillullugu salliutinneqartussat, Múte B. Egede ullup ingerlanerani IA-mi siulersuisuunernik ataatsimiigiaqqusiniartoq oqarpoq.
Sermitsiaq.AG-mit ilisimaneqarpoq, Eri Jensenp IA-mik ataatsimeeqateqannginnermini Demokaraatinik ataatsimeeqateqarsimasoq, Demokraatit sapaatip akunnerata naanerani naalakkersuisooqatigiinnermut isumaqatigiissut maanna atuuttoq, Siumumi politikkikkut nutaamik siunnerfeqarnermik qulakkeerinnittussaq eqqarsaatigisussaasimavaat.
Siumut politikkikkut saamiup tungaanut sangungaatsiarsimammat, Demokraatillu maanna naalakkersuisooqatigiittut isumaqatigiissutaasumut peqataanerminni arlalitsigut tunniutiinnartarsimammata ilimanarpoq, Demokraatit Siumumi aqutsisut nutaat saqqimmiussaannut isumaqataasinnaasimanngitsut.
Isumaqatigiissuteqarnissamut piffissaliussaq
Erik Jensen isumaqatigiissuteqarniarluni ulapittoq qularnanngilaq. Ukiuuneranilu ullormi ataatsimiinnissami siullermi, tassa februaarip 16-iani isumaqatigiissuteqarnissaq anguniarneqannguatsiarluni, tassani Kim Kielsen Naalakkersuisut siulittaasuattut qinersisoqarnissaanik nalunaaruteqarsinnaavoq.