Skip to main content

Erik isumaqatiginninniarunnaarnerit pillugit: Tusaatissatut tiguarput

Siumut naalakkersuisoqatigiilernissamut isumaqatiginninniarnernit IA-mit ullumi ilaatinneqarunnaarput. Taama nalunaarfigineqarneq tusaatissatut tiguneqarpoq, taamaattoq tunngavilersuutigineqartoq Siumumit paasiuminaatsinneqarluni.

Inuit Ataqatigiit naalakkersuisoqatigiinnissamut isumaqatiginninniarnerminnit Siumut peqataatikkunnaarpaat. Siumut iluminni assortuussuteqarnera patajaatsumik naalakkersuisoqatigiinnissamut tikkuussinngitsoq tunngavilersuutigineqarpoq.

Taamalli tunngavilersuuteqarneq Siumumit paasiuminaatsinneqarpoq:

- Soorunami taama nalunaarneq tusaatissatut tiguarput. Taamalli oqareerlunga oqassaanga Siumut iluminni ataatsimoorpoq. Inatsisartuni grupperput ataatsimeeqatigeqqammerpara, tassanilu qulakkeerluinnarlugu ilutsinni ataatsimoortugut, Erik Jensen (S) Sermitsiaq.AG-mut oqarpoq.

Taanna erseqqissaavoq partiip iluani assortuussutaasimasinnaasut tamarmik oqaloqatigiissutigineqarlutillu torersumik naammassineqareersimasut, partiilu maanna siumut isigisumik sulinissamut piareeqqasoq.

- Soorunami uggornarpoq isumaqatiginninniarnertut taaneqartuni sammisat aalajangersimanerusut peqataajunnaarnissarput tikillugu eqqartorneqalersimanngimmata. Siumulli Inatsisartuni sulinermini inuiaqatigiinnut sullississalluni piareersimavoq, Erik Jensen oqarpoq.

- IA qineqqusaarnerup nalaani ammasumik tamanullu suleqatiginninnissamik oqariartuuteqarsimagaluarpoq. Siammasissumilli suleqatigiinnissamik oqarneq maanna takuarput oqaasiinnaavoq, oqarpoq.

Sammisat arlallit tusarusunnartut

Siumut siulittaasuata, Erik Jensenip uggoraa isumaqatiginninniarnerni sammisat aalajangersimasut tikinneqarsimannginnerat.

- Sammisat arlallit suleqataaffigerusussimagaluarpagut. Soorlu ilinniartitaaneq, meeqqat inuusuttullu atugaat, aalisarneq, piniarneq, nunatta ineriartortinneqarnissaa, takornariaqarneq, inuussutissarsiorneq allarpassuillu. Taamaattoq sammisat tigussaanerusut tikinneqanngitsoorput, Erik Jensen nassuiaavoq.

Taanna nassuiaavoq nammineq maluginiarsimallugu isumaqatiginninniarnissat sioqqullugit IA partiinut aalajangersimasunut suleqateqarnissamik isumaqatigiissuteqarsimasinnaanera. Suleqatissallu siumoortumik isumaqateqarfigisimasat tassaanngillat Siumut.

- Kisianni soorunami isumaqatiginninniarnissanut akuersisimavugut nunatta ineriartorneranut sunneeqataarusukkatta suleqataarusullutalu. Takusinnaareerparput IA partiimut aalajangersimasumut suleqatiginnikkusuttoq, aamma qinersineq sioqqullugu, Erik Jensen oqarpoq.

Siumoortumik isumaqatigiittoqanngilaq

IA-p siulittaasua Múte B. Egede Sermitsiaq.AG-mut illuatungiliivoq isumaqatiginninniartoqartinnagu partiinut allanut siumoortumik isumaqatigiissuteqartoqarsimannginneraalluni.

- Patajaatsumik naalakkersuisoqatigiinnermik ingerlatsinissaq pingaartipparput. Aamma naalakkersuisoqatigiinni suleqatigilerumaagassatut naatsorsuuteqarfigisinnaajumavagut ukiuni sisamani tullerni. Taakku saniatigut sammisani angisuuni itisileeqqusilluta apeqquteqarsimavugut. Soorlu Kuannersuarnut tunnmgatillugu, taannami unitsikkusukkatsigu. Qanoq ilinikkulluunniit isumaqatiginninniarnerit sioqqullugit partiinut arlaannaanulluunniit isumaqatigiissuteqareersimanngilagut, oqaloqatigiinnernili siullerni patajaatsumik ingerlanissamut tunngavissat inissinniarsimallugit, Múte B. Egede oqarpoq.

Atassut aamma Naleraq suli isumaqatiginninniarnerni peqataapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER