Eqqusseriartoq haship anillannissaata tungaanut tigummigallarneqarpoq

Eqqartuussisoqarfik Sermersuup angut 46-nik ukiulik hashimik eqqusseriarsimasutut februaarip 7-ata tungaanut tigummigallarneqartussanngortippaa.

Marlunngornermi iioraalluni eqqusseriartoq Kangerlussuarmi mittarfeqarfimmi tigusarineqarpoq. Angut 46-nik ukiulik Sisimiunut angalasoq pineqarpoq.

Angulli tikiffissaminut tikinngilaq, taarsiullugu Nuummut aallarunneqarpoq, tassani politiinit tarrarsorneqarluni assilineqarpoq. Angut hashinik 100-t missaanniittunik timiminiittuuteqartoq, tassani paasinarsivoq.

Angut eqqartuussisoqarfimmit februaarip 7-ata tungaanut tigummigallarneqartussanngortinneqartoq, pigaartut pisortaat Bruno Brix sisamanngornermi ilisimatitsivoq.

Ulluni marlussunni sivisussuseqarajuttartoq

Kisianni iperagaanissaanut piffissaq taama sivisutigisumi utaqqissasoq qularnarpoq.

Angut hashimik timiminiittuuteqarunnaaruni ingerlaannaq iperagaassasoq, Bruno Brix nassuiaavoq, pigaartullu pisortaata oqarnera naapertorlugu ullunik marlussunnik sivisussuseqarajuttarpoq.

- Hashit poortorneqarsimasut timaaniikkunnaariarpata iperassavarput, Bruno Brix oqarpoq.

Hashimik tuniniagassamik anngiortumik eqqusseriarsimasutut unnerluutigineqarpoq.

Powered by Labrador CMS