Eqqumiitsuliortunut piorsarsimassutsimillu suliaqartunut 2,3 milliuunit koruuninik aningaasaliisoqarpoq
Eqqumiitsuliornermut piorsarsimassutsimullu immikkut 2,3 milliuunit koruuninik aningaasaliisoqarpoq. Tamanna isumaqarluinnarpoq, taperneqartut ilaat oqarpoq.
Eqqumiitsuliortunut piorsarsimassutsimillu suliaqartunut aningaasaliissutit 20-t katillugit 2,3 milliuunit koruuninik aningaasartaqartut Naalakkersuisunit tunniunneqarput. Aningaasaliissutit tunniunneqarput eqqumiitsuliornermut piorsarsimassutsimullu aningaasaliissutit 2018-imoortut qaffanneqarnissaat Inatsisartunit aalajangerneqareersorlu.
29-it qinnuteqarput, taakkunanngalu 20-t aningaasaliiffigineqarlutik. Aningaasaliiffigineqartut 20-iusuni qinnuteqaamminni aningaasanik qinnutigisaminnik tunineqarput. Kultooreqarnermut naalakkersuisoqarfik ilisimatitsivoq.
Aningaasaliiffigineqartut ilagaat Qiajuk Productions, taanna qitinnermik isiginnaartitsissusiamik takutitsissamaarpoq. Suliamut, 2020-mi naammassisussamut, 500.000 koruuninik taperneqarput.
- Tamanna isumaqarluinnarpoq. Aningaasat taama amerlatigisut aningaasaliissutitut pigatsigit maniguunnaqaaq, eqqumiitsuliortorpassuimmi pisariartippaat, aammali tulluusimaaqaagut, Ruth Montgomery-Andersen, Qiajuk Productionsimik ingerlatsisoq oqarpoq.
Meeqqat inuusuttullu sammineqassapput
Isiginnaagassiami meeqqat inuusuttullu 13-iniik 25-t tungaannut ukiullit sammineqassapput. Isiginnaagassiaq kinaassutsimut, inuusuttuunermut, tulluusimaarnermut imminullu nassaariniarnermut tunngassuteqarpoq. Isiginnaagassiaq kalaallisut suliarineqassaaq nunalli tamalaat akornannisut isiginnaagassiatut pitsaatigissalluni.
- Suliatta inuusuttut nutaaliornissamik eqqarsaatississinnaavai. Taama ittumik inuusuttunut amigaateqartoqartoq isumaqarpugut. Suliami uani qitittariaaseq Urban Style HipHop misilissavaat, Ruth Montgomery-Andersen oqarpoq.
Aningaasaliiffigineqartut ilagaat Ujarneq Fleischer, 130.000 koruuninik taperneqarsimasoq, taanna inuusat atorlugit isiginnaagassiamik “Ukki”-mik taasaminik Qaanaamut isiginnaartitsiartornissaminut aningaasaliiffigineqarpoq.
Agguagassat pingasut
Eqimattanut pingasut agguaalluni aningaasaliisoqarpoq. Eqimattaq, Qiajuk Productionsip ilaaffigisaa isiginnaartitsisartut isiginnaartitsinermillu suliaqartut kattuffiata eqimattaraa. Eqimattaq taanna katillugit 1,8 milliuunit koruuningajanik aningaasaliiffigineqarpoq. Timersornermut piorsarsimassutsimillu suliaqartut eqimattamiittut katillugit 100.000 koruuninik aningaasaliiffigineqarput. Kiisalu kalaallisut atuakkiortut eqimattaat katillugit 430.000 koruuninik aningaasaliiffigineqarlutik.