Eqqumiitsuliortunut ataqqinaammik tunniuttagaqarnermut nutaamut illuatungiliuttut akerliliigaluarput iluatsinngitsumilli
Illuatungiliuttuni partiit Demokraatit Atassullu, eqqumiitsuliortumut ataqqinaammik tunniuttakkamik ukiumut 250.000 koruuninik aningaasartalimmik ukiullu qulit angullugit tunniunneqartartussamik Naalakkersuisut tunniussisalernissamut periarfissaqalernissaannut akerliupput.
Ataqqinaammik tunniuttagaqalernissamik aaqqissuussineq nutaaq inatsisissatut siunnersuut Inatsisartuni sisamanngormat aappassaaneerneqarmat qanilliallappoq. Siunnersuut akuersissutigineqarpoq, pingajussaaneerneqarnissaalu naammassinnagassaq amigaataalerluni.
Siunnersuummi pingaarnertut pineqarpoq, Naalakkersuisut ataqqinaammik tunniuttakkamik ukiumut 250.000 koruuninik aningaasartalimmik ukiut qulit tikillugit tunniunneqartarsinnaasussamut periarfissaqalerusunnerat. Ataqqinaammik tunniuttakkanik sisamanik eqqumiitsuliortunut nunamilu maani eqqumiitsuliorneq siuarsarniarlugu tunniussisoqarsinnaassaaq.
Siunnersuut ukiumut 1 million koruunit angullugit akeqassaaq.
Siunnersuutip aappassaaneerneqarnerani partiit Demokraatit Atassullu akerliliigaluarput iluatsinngitsumilli, oqallinnerlu politikerit akornanni sakkortuvoq, taamaammallu Inatsisartut siulittaasuat Kim Kielsen inersuarmi pissuserissaarnissamik ilaasortanut arlaleriarluni qinnuiginnittariaqarsimalluni.
Sulinermut akissarsitsisarnissaq kissaatiginerugaluaraat
Demokraatit pingaarnertut isumaqarput, siunnersuut pingaarnersiuinerlunnermut ersiutaasoq, oqaaseqartorlu Nivi Olsen ima oqarpoq:
- Facebook ammaraangatsigut takusinnaasarparput meeqqat nappaatinut nunani allani katsorsartinniarlugit inuinnaat katersuiniarnerannik suliaqartoqartoq. Piumasaqaatitaqanngitsumik ukiuni qulini akissarsisitsisarneq uagutsinnut tulluartuunngilaq. Aningaasaaterpassuaqarsimagaluarutta tamanna ajoriffissaqartissimassanngikaluarparput.
- Eqqumiitsuliortut sulinerannut annertunerusumik akissarsisitsisarnissaq kissaatiginerugaluarparput, Nivi Olsen oqallinnermi oqarpoq, tamatumanilu aamma oqaatigalugu, inunnut toqqakkanut piumasaqaatitaqanngitsumik ukiumut 250 koruuninik akissarsisitsisarneq innuttaasunik annertuumik assigiinngisitsinerunnginnersoq.
Aaqqissuussineq eqqumiitsuliortunit inuusuttunit iluaqutigineqassava?
Atassutip siulittaasuata Aqqalu C. Jerimiassenip eqqumiitsuliortut inuusuttut aaqqissuussinermik nutaamik iluaqutiginninnissaannik ernummatiginninneq erseqqissaatigaa. Ernummatiginneq tamanna Demokraatit isumaqatigaat.
Kultureqarnermut ataatsimiititaliamit aamma maluginiarneqarpoq, ataqqinaammik tunniuttakkat siornatigut eqqumiitsuliornermik suliaqarsimaneq tunngavigalugu tunniunneqartassasut, taamaalillunilu tunniuttakkat eqqumiitsuliornerup ineriartorneranut siuarsaataanissaat nalorninartoq, ataatsimiititaliap isumaliutissiissutaani atuarneqarsinnaavoq.
Kultureqarnermut Naalakkersuisup, Peter Olsenip (IA), pingaartippaa eqqumiitsuliortut utoqqaanerit aamma pinngorartitsisinnaasut tunniuttakkanillu tunineqarsinnaasut, eqqumiitsuliortunullu pinngorartitsisunut utoqqaanerusunut assersuutissatut ilaatigut Aka Høegh aamma Rasmus Lyberth oqaatigalugit.
Tamatumunnga atatillugu kultureqarnermut ataatsimiititaliap siulittaasuata, Doris J. Jensenip, naalakkersuisumut erseqqissaatigaa, ataqqinaammik tunniuttakkap eqqumiitsuliortunut inuusuttunut qanoq iluaqutaasinnaanera ataatsimiititaliami amerlanerussuteqartut Naalakkersuisunut isumaliutigeqqusimagaat.
Amerlanerussuteqartut taperseraat
Ataqqinaammik tunniuttakkat nutaat amerlanerussuteqarluartunit, Siumumit, Inuit Ataqatigiinnit Naleqqamillu tapersersorneqarput.
Taamaattumik pingajussaaneerinninnissaq inaarutaasumik akuersissutiginniffiusussaq sioqqullugu siunnersuut aappassaanerinninnermit taasinikkut ingerlateqqitassanngortinneqarpoq.
Inaarutaasumik akuersissutiginninnerup kingorna Naalakkersuisut nalunaarummik ataqqinaammik tunniuttakkat nutaat pillugu qanimut aalajangersakkanik imalimmik suliaqassapput.