Eqqumiitsuliortorsuaq Kunngi toqukkut qimaguppoq

Taalliortoq qalipaasorlu Frederik Kunngi Kristensen 69-inik ukioqarluni toqukkut qimaguppoq.

Frederik 'Kunngi' Kristensen 1952-imi Uummannami inunngorpoq, 1974-imilu Nuummi Grafisk Værskedimi, Eqqumiitsuliornermik Ilinniarfimmut aallarniutaasimasumi ilinniartut siulliit ilagisimavaat.

Assilialiornerup taalliornerullu iluini ukiorpassuani suliaqartarsimavoq Kalaallillu Nunaanni kulturi pillugu eqqumiitsuliortutut ilisimaneqarluartuulluni. Aamma nipilersuutinik saqqummersitsisarsimavoq.

Kunngi sivisuumik napparsimareerluni tallimanngormat toqukkut qimaguppoq.

Eqqumiitsuliortoq 2020/2021-p ukiuunerani kingullermik suliaqarpoq, Nuuk Kunstmuseummimi saqqummersitsigami.

2011-mi kulturikkut nersornaasiuttakkamik tunineqartoq

ICC-mi præsidentiusimasup IA-milu politikkeriusimasup Aqqaluk Lyngep tassunga atatillugu, Kunngi Kalaallit Nunaanni eqqumiitsuliortorsuartut kalaallillu oqaasiinik pinnguarsinnaanera pillugu nersualaarinnissimavoq.

Kunngi nunami maani nunanilu allani kulturikkut immikkut suliniuteqartarsimasutut 2011-mi Naalakkersuisut kulturikkut nersornaasiuttagaannik nersornaaserneqarpoq, tassungalu atatillugu naalakkersuisoq Mimi Karlsen ilaatigut oqarpoq:

- Nersornaaserneqartussaq siulleq tassaavoq eqqumiitsuliortoq tamatigoortoq, imaannaanngitsoq ukiorpassuarnilu qalipakkanik assilialiortarnermigut ilisimaneqarlualersimasoq. Nammineq suliaminik arlaleriarluni saqqummersitsisarpoq aamma allat peqatigalugit nunatsinni nunanilu allani saqqummersitsisarluni, suliakkiutinik kusanarsaataasunik suliaqartarpoq titartagartalersuisarlunilu, soorlu atuakkanik aamma allagartarsualianik, juullip nipitittagaanik kiisalu suliffeqarfiit ilisarnaataannik.

Eqqaaniaanissamik pilersaaruteqartoqartoq

Kunngi Frederik qulingiluaat Dronning Ingridilu illoqarfimmut inunngorfianut 1952-mi tikeraartut inunngorami Kunngimik taaguuserneqarsimavoq.

Kunngi unnummut nalunaaqutaq 19:00 Uummannap oqaluffiani eqqaaniarneqassaaq. Tassani erinarsuusiaa, Pavunga qaqqamut, erinarsorneqarlunilu naneruutinik ikitsisoqassaaq.

Facebookimi eqqumiitsuliortoq qupperniliuunneqarsimavoq, eqqaaniaanerpassuillu tallimanngormalli ilanngussuunneqartalersimallutik.

Powered by Labrador CMS