nersorinninneq

Eqqumiitsuliortoq Kristine Spore Kreutzmann Juuntaap Nersorinnissutaanik pissarsivoq

Kristine Spore Kreutzmann marramik allanillu nutaalioriaatsini pillugit nersorneqarpoq

Prismodtageren Kristine Spore Kreutzmann sammen bestyrelsesformand Karen Motzfeldt og bestyrelsesmedlem Claus Motzfeldt

Jonathan Motzfeldtip aningaasaateqarfiata siulersuisuisa ukioq manna ilusilersuinikkut nutaaliortartut immikkut sammisimavaat.

Taamaammat Kristine Spore Kretzmann ukioq manna Juuntaap Nersorinnissutaanik 50.000 koruuninik aningaasartalimmik nersornaatisissasoq toqqarneqarpoq. Siulersuisut tusagassiuutinut nalunaarummi allapput.

- Eqqumiitsuliortup Kristine Spore Kreutzmannip piginnaatsini, ilinniarsimanini sulia qartarninilu atorlugit ilusilersueriaaseq immikkoorutilik pilersissimavaa. Atortussat misilittarlugit – soorlu marraq – Issittumi Nunatsinnilu nassaassaasoq nutaaliortumik ilusilersortalersimavaa. Kristinep eqqumiitsulioriaaseq kalaalerpalaaraluarluni nunat tamalaat akornanni ileqquusunut sanillersuunneqarsinnaasoq misilittaalluni pilersissimavaa, aningaasaateqarfik tunngavilersuilluni allappoq.

Kristine Spore Kreutzmann eqqumiitsuliortutut marriortutullu ilinniarsimavoq. Nuummi Eqqumiitsuliornermut Atuarfimmi aallarteriarluni Bornholmimi Kunstakademiets Designskolemi 2014-imi ilinniarnerminik naammassinnippoq. Tassani ilinniarnerminut atatillugu qaammatit pingasut Japanimi aamma najugaqarpoq. Maanna Kristine Nuummi
sulliveeraqarpoq.

Tassani Kristine Spore Kreutzmann ilaatigut qummuattaaqqat, tiitorfiit qallutit, marriat, qulliit marrarnik sanaat, porcelæn aamma savap meqqui atorlugit suliaqartarpoq. Marriat ujalunik, amernik atortussallu allat pinngortitameersut atorlugit misilittaasarpoq. Nuup Kangerluani marrarmik allaat atugassaminik aallertarpoq.

2017-imi apriilimi Københavnimi Kalaallit Illuutaanni suliaminik saqqummersitsinermini sanaanik pillugit ima oqaluttuarpoq:

- Marriortarninni kalaallit atortuutigut misilittaatigalugit allatulaaq nutaaliuutiginiarlugit atortuliunniartarpakka. Pinngortitarput, saanermik ukkusissamillu qiperueriaasitoqqavut, ammereriaasitoqqallu isumassarsiffiginiartarpakka. Sulianni ullutsinni Nunatsinni eqqumiitsuliortut sammisarisartagaat sammivallaarneq ajorpakka, pinngortitarput, kulturerput piniarnermullu tunngasut abstraktinngorlugit suliarisarpakka.

Nersornaat Jonathan Motzfeldtip Aningaasaateqarfiata pilersinneqarnerani Juuntaap nammineq oqarsimanera naapertorlugu tunniunneqartumut kajumissaatitut tiguneqartassaaq.

- Marriortarnermigut naggueqatigiit Inuit ilusilersueriaasiat porcelænilu akimut ersittoq sikassaat qalliuttagaq (glasur) atorlugit pissanganaatilimmik eqqumiitsuliortutut inuusuttutut nutaaliortalersimanera ilisimaneqaatigilersimasaalu pillugit “Juuntaap
Nersornaasiuttagaa” Kristinemut tunniunneqarpoq, siulersuisut allapput.

- Nersortariaqarlunilu ataqqineqartariaqarsorinarpoq Kristinap eqqumiitsulioriaatsini taamatut nutaaliortoq inuutissarsiutigilerniarlugu aalajangersimammat suliaalu immikkuullarissut inunnut amerlanernut siammarsinnaalissammata.

Siulersuisut neriupput nersornaat manna kajumissaatissaq eqqumiitsuliortumut/ilusilersuisartumut piginnaaneqarluartumut kalaaliusumut ilisarineqarnerulissutaaginnarani, aamma angusaqarniartilluni pilersitsiniarlunilu avammut saqqummiiniarluni
tamaviaarnerup piginnaaneq, nikallujuissuseq piumassuserlu takutissimasaq pillugu nittarsaataajumaartoq.

”Juuntaap Nersornaasiuttagaa” ukiut tamaasa inummut ataatsimut (amerlanernulluunniit) – ingammik inuusuttunut – immikkut maluginiagassamik iliuuseqarsimasunut, immikkooruteqarluinnartumilluunniit pikkoriffeqartunut piginnaaneqartunullu tunniunneqartarpoq.

Powered by Labrador CMS