Eqqumiitsuliortoq Japanimiut titartaariaasiat isumassarsiorfigalugu Naalakkersuisut juullimi pilluaqqussutissaannik suliaqarsimavoq

Inuusuttoq eqqumiitsuliortutut nutaaliornermini suliaminut aallussilluartartoq.

Naalakkersuisut Siulittaasuat Múte Bourup Egede eqqumiitsuliortoq 32-nik ukiulik Nicoliinnguaq Cortzen pillugu taamatut oqarpoq.

- Ukioq manna Naalakkersuisut Juullimut pilluaqqussutaanik suliaqarnissaminut akuersisimammat nuannaarutigeqaara, siulittaasoq oqarpoq.

Nicoliinnguaq Cortzenip nassuiaatigaa, ukioq manna juullimut pilluaqqussutissaq pillugu titartakkami takuneqarsinnaasoq Qasigiannguani juullertarnera aamma illoqarfiup orpiata inissisimaffigisartagaanut isikkivik takuneqarsinnaasoq. llut takuneqarsinnaapput, taanna oqarpoq:

- Inuunerma annerpaartaani Ilulissani najugaqarsimagaluarlunga sumi peroriartorsimanerlunga titartakkatigut takussutissiissutiginiarlugu titartarsimavara. Titartakkami illu kajortoq ”Sukkulaaq” takuneqarsinnaavoq. Qasigiannguit pillugit titartaanerit tamaasa ”Sukkulaannguaq” titartakkani ilaajuaannarpoq.

Eqqumiitsuliortup angorusutaa

Nicoliinnguaq Cortzen Nuummiittumi Eqqumiitsuliornermik Ilinniarfimmi eqqumiitsuliortutut ilinniarsimavoq. Inunnguuserisaminik autistimut ilisarnaateqarnerata soqutigisaminik aallusserusussuseqartilersarpaa tassungalu tunngasunik ilinniartikkusulertarlugu, Naalakkersuisut Siulittaasuata Naalakkersuisoqarfianit ilisimatitsissutigineqarpoq.

Inuttaata Japanimiut titartaariaasiinik anime-mik aamma manga-mik soqutigisaqarnerata eqqumiitsuliaani takussutissaqartippaa. Taakkua saniatigut nammineerluni Japanimiusut ilinniarsimavoq Japanimilu angalasimalluni.

- Massakkut Majoriamiittarpunga naammassigukkulu Japanimukarlunga titartakkanik titartaasartutut ilinniarusullunga, Nicoliinnguaq Cortzen oqarpoq, nangillunilu oqaatigalugu Kalaallit Nunaannut uteqqilluni titartaasutut sulilernissani takorluugaralugu.