Eqqumiitsuliortoq emojimik saqqummersitivoq

Inuit pisinnaatitaaffiinik sorsuutiginnittartoq eqqumiitsuliortorlu Seqininnguaq Lynge Poul-sen qaammatini kingullerni Twitterimi ilusilersuisartut suleqatigalugit UN Youth Envoy-imi suliniummut #Youthlead (inuusuttut siuttui) suliaqarput.

- Tamassuma saniatigut suliniutip ilisarnaatissaannik kusanartuliamik qalipaavoq, tusagassiutinut nalunaaruteqartoqarpoq.

Eqqumiitsuliortoq Seqininnguaq Lynge Poulsen inuit pisinnaatitaaffiinik sorsuutiginnittuuvoq eqqumiitsuliortorlu, ICC sinnerlugu sulialik kiisalu Global Indigenous Youth Caucusimi issittoq sinnerlugu oqaaseqartartoq.

Kulturitta saqqummiunnissaa

- Nunarsuatsinni inuusuttut oqallinnerni taamatullu siunissap qanoq ilusilersorneqarnissaannik tamatigut peqataanissaat pingaaruteqartorujussuuvoq. Tamanna pillugu UN Youth Envoyip Twitterillu suliakkiutaanut akuersivunga. Inuusuttuusugummi siunissaannaaginnarata, aamma ullumikkut inooqataavugut, oqaluttuarpoq.

- Ilusilersuisartunik sulisitsilluni misiliineq pissanganaqaaq, pingaartumik sulisitakka nunarsuaq tamakkerlugu suliffeqarfimmit Twitterimeersuummata. Sulianni inuusuttut siuttut sumiuussutsit tamarmik inuiaallu ikinnerussutillit akornanneersut qanoq iliorluni saqqumilaartinneqarsinaanersut pillugu ilusilersuisartut siunnersuisuuffigaakka. Taamaattumik kusanartulianni saqqummersinniarsimavakka, ilaatigut inuit kultoorianni ileqqutoqqatsinniit qanoq kakiortittarnerput taamaaliornikkut nunat inoqqaavineersuunitsinnit pinnissuserput naqissuserusullugu, soorluttaaq kusanartuliami nujat qalipaasersorsimagikka qalipaatinik assigiinngiiaartunik nunarsuartsinni assigiinngisitaartuune-put naqissuserusullugu. Nunarsuatsinnimi kultoorit, kinaassutsit, suiaassutsit, upperisat ilaallut ilanngullugit assigiinngisitaartuupput, Seqininnguaq Lynge Poulsen oqarpoq.

Emoji nunarsuaq tamakkerlugu UN Youth Enoy-ip Twitterimi quppernerani saqqummersinneqarpoq sapaatip akunnerani matumani.