Eqqumiitsuliorneq: Inuusuttut streetartimik ilinniartinneqartut

Franskeq kusanartuliorluni qalipaasartoq Pascal Amblard, ukioq manna Sanasa pillugu suliniuteqarnermut atatillugu Qaqortumi Sulisartut Højskolianni atuartunik ilinniartitsisunillu streetartimik ilinniartitsisimavoq.

Sanasa – sanaqatigiitta – inuusuttut inuussutissarsiutitigut ilinniagaqarnissaannut kajumitsitsilissaaq, tassani qalipaasuuneq immikkut sammineqarsimalluni.

- Illoqarfinni nunaqarfinnilu ilinniartitsisut piumassuseqarluartullu titartaanermik streetartimillu ilinniartitsisoqarnissaanik ujartuisimapput. Pingaartumik ilinniartitsisut ulluinnarni ilinniartitsinerminnut isumassarsisinneqarnissaq pisariaqartissimavaat, suliniummik aqutsisoq Heidi Zilmer oqarpoq, nangillunilu:

- Taamaammat ukioq manna Sanasa 2020 pillugu suliniuteqarnermi arlalitsigut workshoppertitsisoqassaaq aamma inuusuttut illoqarfimmilu inersismasut nutaaliorusussuseqartutimmikkut ilisimasaqarluartunit ilinniartitsisoqartinneqassallutik.

Great Greenlandimi pinnersaasersuisimaneq

Ukioq manna suliniummut atatillugu inuusuttut Great Greenlandip Qaqortumi ammeriviani, franskimit Pascal Amblardimit, qalipaasutut sulisumit aamma annertuunik titartaanermik streetartimillu immikkut ilisimasaqarluartumit ilitsersorneqarlutik pinnersaasersuisimapput.

Suliassarisimavaat, siusinnerusukkut ilinniartuusimasup, puisi ilulissap qaavaniittoq ”Aataakulooq” qalipassimasaa najoqqutaralugu assilialiornissaq.

- Qalipagaq nutaaq nuannaarutigeqaarput – kusanarluinnartumik suliarineqarsimavoq, inuusuttullu ullut pingasuinnat atorlugit taama ittumik suliaqarsinnaanerat tupinnarluinnarpoq, Great Greenlandimi pisortaq Preben Møller tusagassiorfinnut nalunaaruteqarnermi oqarpoq.

Sanasa pillugu suliniut pingajussaanik Kujataani ingerlanneqarpoq, Heidi Zilmerillu ilisimatitsissutiga, aningaasaateqarfiit aningaasaliissuteqartartullu ukioq manna suliniuteqarnermut 750.000 koruuninik tunissuteqarsimasut.

Nanortalimmi ilinniartitsinissat kinguartinneqartut

Sanasap Nanortalimmi ingerlateqqinneqarnissaa siunertaagaluarpoq, tassani eqqumiitsuliortoq Nuka Godtfredsen Heidi Zilmer peqatigaluguatutartunik ilinniartitsisunillu arlalinnik ilinniartitsisussaagaluarlutik.

Coronali pissutigalugu kinguartinneqarsimavoq:

- Sanasa pillugu suliniutip Nanortalimmi aallartinnissaa qilanaarisimagaluaqaara. Sulilumi qilanaarpunga, suliniummi soorunami aallartisssavarput. Illersorneqarsinnaasumilli naammassineqarnissaata qularnarunnaarnissaanut utaqqisariaqarpugut, Nuka Godtfredsen oqarpoq.

Sanasa 2020 pillugu suliniut ukunannga tapiiffigineqarallarsimavoq, Kommune Kujalleq, Oak Foundation Denmark, INI, Great Greenland, Majoriaq, Kansas, Royal Arctic Line, Air Greenland & STARK Qaqortoq