Eqqumiitsuliat
Eqqumiitsulianik saqqummersitsiviliortoqassasoq IA siunnersuuteqartoq
Eqqumiitsulianik saqqummersitsivik pilersinneqassappat 200 millionit koruunit missaannik akeqassaaq
Kalaallit eqqumiitsuliaannut saqqummersitsiveqalerpat, inuiaqatigiinnut pisuunnguallaataallunilu Nunatsinnullu takornarianut nuannaarutaassaaq.
Múte Bourup Egedep (IA) tamatuminnga siunnersuutaa, ullumi Inatsisartuni oqallisigineqarpoq. Siunnersuullu 200 millionit koruunit missaanni akeqartussatut naatsorsuutigineqarpoq.
Saqqummersitsivimmik amigaateqartoqartoq
- Kalaallit Nunaat eqqumiitsuliortunik amerlasuunik peqartoq eqqumiitsuliortarnerlu ileqqutoqarivarput. Eqqumiitsuliornikkulli erlinnartuutitsinnut nunatta saqqummersitsiviatut sinaakkutissamik amigaateqarpugut.
- Sinnaakkutissaq qanga ullutsinnilu eqqumiitsulianik katersanut sinaakkutaasoq, peqatigisaanillu eqqumiitsulianik katersanut ilaanngitsunik nikittaattumik saqqummersitsisinnaanermut periarfissiisoq. Kalaallit eqqumiitsuliaannik nunatta saqqummersitsivia amigaatigaarput, Múte Bourup Egedep siunnersuutini tunngavilersorpaa.
Takornariaqarnermut iluaqutaassasoq
Tassuma saniatigut erseqqissaatigaa, eqqumiitsuliaanik nunatta eqqumiitsulianik saqqummersitsiveqalerneratigut eqqumiitsuliornermik ingerlatsisut eqqumiitsuliaminnik saqqummersitsillutillu tuniniaasinnaalernerannik periarfissiissasoq.
- Sanaartornerullu nalaani sanaartorneq sanaartortunut suliassaqartitsissaaq. Taamattaarlu nunatta eqqumiitsulianik saqqummersitsivianik pilersitsineq takornariartitsinermik inuussutissarsiuteqartunut iluaqutaassaaq, Kalaallimmi Nunaat pilersitsisoqarneratigut takuniagassaqqissunik pingaarutilimmik peqarnerulissaaq, tamannalu Kalaallit Nunaata takornariarfissatut soqutiginarneranik suli annertunerulersitsissaaq, IA-mi politikeri oqarpoq.
Atuaruk: Saqqummersitsisarfissaq sivitsuuttoorpoq