Skip to main content

Eqqissiviilliortoqaqqilersoq: Krusep siulittaasup tulliatut atuunnini eqqarsaatigilerpaa

Siumumi siulittaasup tulliata Karl-Kristian Krusep Naalakkersuisut taakkulu aalisarnermut tunngatillugu politikkiat naammaginngilluinnarpaa. – Politikkikkut aqutsisunut tusarnaarneq ajortunut peqataaginnassanerlunga eqqarsaasersuutigaara, Siumumi politikkeri ilisimatitsivoq.

Naalakkersuisooqatigiinni partii aqutsisoq – Siumut – ilumini annertuunik ajornartorsiuteqarpoq. Aasaq Siumumi politikkerit arfineq-marluk akerliunerat inissinneqarpoq. Maanna siulittaasup tullia naammagittaalliorpoq.

Karl-Kristian Krusep Naalakkersuisunut oqariartuuteqartarluni nukimminik atuisarnini qatsuppaa.

- Ataasiaannarnanga, arlaleriarlungali Naalakkersuisunut piumasaqartarsimavunga, aalajangiussaminnik attassiinnartarmata iluaqutaanngitsumik, Karl-Kristian Kruse tusagassiorfinnut nalunaaruteqarnermini ilisimatitsivoq.

Siunissamut qularuteqarneq

Siulittaasup tulliata Siumumi ilaasortaaginnarnissani qularutigilersimavaa.

- Siumumi ilaasortaagaluarlunga sumut ingerlatsisoqarniarnera naluara. Tamanna uannut peqataaffigiuminaappoq, politikkeritut misilittagartooq arlaleriarluni naalakkesuisuusarsimasoq erseqqissaavoq.

Karl-Kristian Kruse pingaartumik Uummannami Qeqertasuullu tunuani piniartut aalisartullu pillugit ernumassuteqarpoq, taannami isumaqarpoq, Naalakkersuisut piniartut aalisartullu suliaqaannarnissaannik qulakkeerinninniarlutik iliuuseqanngippallaartut.

Akuersaarneqarsinnaanngitsoq

- Naalakkersuisut toqqaannartumik piumaffigisarsimavagut aalisarneq unitsinngikkaluarlugu pissutsinut iliuuseqaqqullugit, kinguneqanngitsumilli, Naalakkersuisut aalajangiinerat akuersaarsinnaanngilara, nunami partiit annersaanni siulittaasup tullia taamatut oqarpoq.

Ernumassuteqarnini imatut itisilerpaa:

- Avataanit tutsuigineqarnerup sianigineqarnissaa, aamma avataaneersut saarullinniartarnissaat pisassiiffiusanngitsullu avataanni aalisartarnissaat attatiinnarpaat.

- Sanna Pinngortitaleriffiup angallataa sapaatip akunnerani ataatsimi malunniluunniit aqutsiveqarfinni misissuisimagaluartoq, tutsuiginassutsimik mianerinninniarlutik akissuteqarnerat akuerineqarsinnaanngilaq, tamannalu unitsinneqarluinnartariaqarpoq!

Unioqqutitsineq

- Aalajangiussamut akerliusumik avataasiortunut pisassiissutit amerlisimavaat, naak sinerissap qanittuani avataanilu qaleralinniartarnerit imminnut attuumassuteqaraluartut.

- Naalakkersuisooqatigiit isumaqatigiissutaanni allassimasoq, pisassiissutit qaffaassutaat inuusuttunut aalisalerlaanullu tunniunneqartassasut unioqqutinneqarpoq, tamannalu akuersaarneqarsinnaanngilluinnarpoq, Karl-Kristian Kruse isornartorsiuivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER