Eqqartuussut: Islandimiut kilisaataanni naalakkap coronamik tuniluuttoqarnera ilaginnarpaa
Islandimiut kilisaataanni covid-19-imik tuniluuttoqarneranik iliuuseqarneq umiarsuup naalagaanut sakkortuumik kinguneqarpoq, taanna kilisaammi coronamik tuniluuttoqarnerani talissimanngilaq.
Islandimiut kilisaataanni naalagaq 36.000 koruunit missaannik akiliisussanngorlugu eqqartuunneqarpoq, taassumalu akuersissutaa qaammatini sisamani atorunnaarsinneqarpoq. Westfjordimi eqqartuussivik sapaatip-akunnerata siuliani eqqartuussinermi aalajangiisuuvoq, islandimiut tusagassiorfiat visir.is taama ilisimatitsivoq.
Oktobarimi kilisaat qerititsiviusoq Július Geirmundsson avataaniippoq, tassanilu umiarsuarmi coronamik tuniluuttoqalerpoq. Umiarsuup naalagaata talikkiartortoqannginnissaa aalajangerpaa, umiarsuamilu inuttanit 25-nit 22-t nappaat ernumagineqartoq, nunarsuarmi inuit inuunerannik amerlasuunik naleqartoq nappaatigilerpaat.
Arlallit suli sulisinnaanngillat
Inuttat ilaasa kattuffiillu umiarsuup naalagaata soraarsinneqarnissaa piumasaraat, qaammatillu pingasut qaangiuttut inuttat ilaat coronamik kingunerluutit pissutigalugit suli sulisinnaanngillat.
Islandimi aalisarnermut inatsimmi paragrafi immikkut ittoq umiarsuup naalagaata unioqqutissimagaa eqqartuussiviup aalajangerpaa.
Umiarsuarmi allat aseruunneqalernissaannut navianartorsiornermut illersorneqarsinnaanngippata, napparsimasoq passunneqartussanngorlugu angallanneqarnissaa umiarsuarmi naalakkap qulakkeertussaaneranut piumasaqaammut paragrafi tunngassuteqarpoq.