Eqqartuussut: Arnaq 26-nik ukiulik inooqatini kapillugu toquppaa

Arnaq 26-nik ukiulik ullumi toqutsisimasutut piffissami killiligaanngitsumi Qallunaat Nunaanni tarnimikkut nappaatillit napparsimavianniittussanngorlugu pineqaatissippaat

Ulloq 4. september 2017 arnap inooqatini sakiaatigut savimmik kapillugu toquppaa. Eqqartuussisoqarfik Sermersuup ulloq 10. december 2018-imi eqqartuussutaanik allannguineq Nunatta Eqqartuussisuuneqarfianit aalajangiinerusoq, politiit tusagassiutinut nalunaarummi paasissutissiipput.

Toqutsineq ulloq 4. september 2017 ullaassakkut Nuussuarmi najugaqarfimmi pivoq. Tassani najuupput arnaq 26-nik ukiulik inooqataa 39-nik ukiulik allallu nangikkiaasut.

Perulluliorneq

Nanginnerup nalaani inooqatigiit isumaqatigiikkunnaarsimapput taakkulu perulluliulerlutik. Tamatuma kingorna arnaq iggavimmut savimmik aalleriarluni inooqatini siorasaalerpaa tamatumalu kingorna najugaqarfiup aneerasaartarfiani perulluliorneq nanginneqarlutik.

Tassani arnap inooqatini uummataata saniatigut sakaatigut kapivaa tamannalu angutip toqqutigaa. Tamatuma kingorna arnap isersimasullu allat qimagupput.

Unnerluussisussaatitaasut arnap Qallunaat Nunaanni tarnimikkut nappaatillit napparsimavianni inissinneqarnissaa eqqartuussivimmut suliassanngortippaat.

Nunatta Eqqartuussisuuneqarfiata eqqartuussutaa tassaalerpoq tarnimikkut nappaatillit napparsimaviannut killiligaanngitsumik inissiinissaq.

Nunatta Eqqartuussisuuneqarfiata eqqartuussummi pingaartissimavaa, toqutsisoqarani – eqqartuussiviup killormuanik – arnaq persuttaasimasoq toqumik malitseqartumik.

Arnaq tarniminikkut nappaatilittut oqaatigineqarpoq taamaammallu pineqaatinneqarsimasut inissiisarfiannut inissinneqarnissaa naleqqunnani.

Arnaq 2017-imi septemberip qaammataaniilli tigummigallangaavoq, piffissap sivisunerpaartaa tarnimikkut nappaatillit immikkoortoqarfianiitinneqarluni.

Unnerluussisoq Nanna Werther oqarpoq:

- Eqqartuussiviup unnerluussisussaatitaasut kissaatigisaat isumaqatigimmassuk iluarisimaarpara.

Powered by Labrador CMS