Eqqartuussut: Apuilluni toqutsineq inuiaqatigiinni sulisitaanermik kinguneqartoq

62-nik ukiulik angummit 20-it sinnilaarlugit ukiulimmit aporneqarami toquvoq. Maanna suliami inuiaqatigiinni sulisitaanermik kinguneqartumik eqqartuussisoqaqqammerpoq, ingerlatsisinnaanermut allagartamik arsaagaalluni aamma qimagaasunut akiligassinneqarpoq.

Kalaallit Nunaanni Eqqartuussivik ullumi tallimanngornermi apuilluni toqutsinermut tunngasumi suliami apriilip 22-anni 2016-meersumi eqqartuussuteqarpoq.

Soqutigittaatsumik ingerlaneq

Angut 20-t sinnerlugit ukiulik eqqartuunneqarpoq, taanna unnuakkut nal. 01.05 soqutigittaatsumik ingerlasimannguatsiarpoq, pisariaqartumillu mianersortussagaluarluni pisuinnaq akunnermut kilometerinik 70-inik sukkassusseqarluni aporpaa.

62-inik ukiulik aporneqarnermini ingerlaannaq toquvoq.

Unnerluunneqartq inuiaqatigiinni akunnerni 40-ni sulisussanngorlugu eqqartuunneqarpoq, ukiunilu pingasuni biilinik ingerlatsisinnaanermut allagartamik arsaarneqarluni, kiisalu toqusup ilaqutaanut 50.000 koruuninik akiligassinneqarluni, unnerluussisussaatitaaneq Tobias Berg taama ilisimatitsivoq.

Pinngitsuunerartoq

Eqqartuussiviup eqqartuussuteqarnerminut atatillugu ajutoornerup pineranit piffissaq sivisooq ingerlasimaneranut aamma unnerluunneqartup ‘’ilisarisimannilluarneranut’’ eqqarsaatiginnissimasoq ilisimatitsissutigineqarpoq, tamanna unnerluussisussaatitaanerup tusagassiuutinut nalunaarummi oqaatigineqarpoq.

Eqqartuunneqartup unnuami tassani biilimikingerlatsisuunini nassuerutigaa, kisianni unnerluussissutaasumi pinngitsuunerarpoq.

Powered by Labrador CMS