Eqqartuussivimmit ilanngutassiaq: Suliaq sutigut tamatigut alianartoq
Angutit inuusuttut sisamat Kujataaneersut ukiuni tulliuttuni Pineqaatissinneqarsimasunut Inissiisarfimmiissapput, angummik 40-t sinnerlugit ukiulimmik toqutsisimasutut eqqartuunneqarnertik inissiisarfimmiissutigissallugu. Eqqartuussisoqarfiup unnerluussisussaatitaasunut tusarnaarnissartik aalajangiuppaat, inuusuttullu ukiuni sisamanit arfineq-marlunnut Pineqaatissinneqarsimasut Inissiisarfimmiittussatut pineqaatissillugit.
- Peqataasimanera peqqissimissutigalugu oqaatigisinnaavara.
Angut 19-inik ukiulik malunnartumik attortisimasoq, sapaatip akunnerata siuliani marlunngornermi ualikkut akunnerit sisamat sinnerlugit unnerluussisussaatitaasup unnerluunneqartullu tallimat illersuisuisa naggataarutaasumik tunngavilersuinerisa kingorna, oqaaseqartinneqarami taama oqarpoq.
Aviisi AG taama allappoq.
Unnerluunneqartut ilaat, 18-inik ukiulik, oqaaseqartussanngorami oqaaseqarpoq:
- Imarsiornermik Ilinniarfimmi ilinniarusuppunga, neriuppungalu sivisuallaamik Pineqaatissinneqarsimasut Inissiisarfianniissananga. Tassungalu peqataasimanera peqqissimissutigisorujussuuara.
»Tassunga« angutit taakku inuusuttut angummut 40-t sinnerlugit ukiulimmut peqqarniitsumik nakuusernermikkut iliuusaannut toqqutigineqartumut tunngavoq, toqungasumik misissuinermut nalunaarusiaq malillugu angut nammineq aamminik ipilluni toqusimavoq. Angut naamigut savimmik kapineqarpoq, tamannalu toquneranut aalajangiisuunngilaq. Akerlianik niaquatigut timaatigullu tukkaanerit isimmitsinerit aamma kuustip ipuanik anaasinerit aalajangiisuupput.
Pillaaniartut
Suliap ingerlanerani angut pillarniarsimagaat saqqummerpoq, anusinngorsarniarsimavaat, ukiuni arlalinni nuliani, arnaq 30-t sinnerlugit ukiulik timaatigut naalliutsittarsimammagu, taanna arnaq suliami inuusuttut angutit sisamaasut ilaannik uiminik, piffissami tassani averuserfigisimasaminik, unataanissaanik kaammattuisimasutut unnerluunneqarpoq.
Angut arnamut nakuusersimasutut ataasiarluni eqqartuunneqarsimasoq, naggataarutaasumik tunngavilersuinermi saqqummiunneqarpoq, tamatuma saniatigut nakuusersimanermut pingasunik nalunaarutigineqarsimavoq. Ilaatigut apriilimi 2020-mi nakuusernermut, tassani arnaq siutimigut kiineqarluni siutaa ilanngarneqarsimavoq. Taanna 45-nik ukiulik siorna oktobarimi unnuakkut alianartumik toqunnginnermini, nakuusersimanerminut eqqartuussivimmut sassartinneqarnissaminik angumersinngilaq.
Aviisimi AG-mi atuarnerusinnaavutit: