Eqqartuussivimmit allaaserisaq: Inuuneq nalinginnaanngitsumik unammillerneqartoq
Nunatta Eqqartuussisuneqarfia arnamut uiminik toqutseriarsimasutut pineqaatissinneqarsimasumut ukiuni marlunni inissiisarfimmiinnissamik eqqartuussummik atuuttussanngortitsimmat sivisuumik napparsimasimaneq aappariinnerlu ajornartorsiuteqaqisoq ilanngullugiit eqqarsaatigineqarsimapput. Unnerluussisoq minnerpaamik ukiunik pingasunik piumasaqarsimagaluarpoq
Eqqartuussisoqarfinni, Kalaallit Nunaanni Eqqartuussivinni aamma Nunatta Eqqartuussisuuneqarfiani suliani tamarluinnarni oqaluttuassaqartarpoq tunuliaqutaasunik.
Inunnik oqaluttuat, inuiaqatigiinni najugaqarfigisatsinni inuit qanoq inuunerannik qanorlu innerannik paasisaqartitsilaarsinnaasut.
Tamanna aamma politiit ukiumoortumik kisitsisitigut paasissutissaataanni kisitsisinut atuuppoq. Siorna toqutseriarnerit arfineq-marluusimapput. Ukiuni kingullerni tallimani kisitsit marlunnik kisitsisitaqarsimavoq, 18-iniit 13-inut nikerarsimalluni. Ukioq manna sapaatip-akunnerani kingullermi sisamanngorneq tikillugu nunatsinni arfineq-marloriarluni toqutseriartoqarsimasoq, politiit AG-mut paasissutissiipput.
Ukioq manna toqutseriarnerit ilaat Nunatta Eqqartuussisuuneqarfiani sapaatip-akunnerani kingullermi sisamanngornermi suliarineqarpoq, AG-millu malinnaavigineqarluni.
Suliareqqitaq
Tamatumani eqqartuussiviup suliami, arnap 40-kkut naajartulerneranni ukiullip uiminik toqutseriarsimasutut pisuutinneqarluni eqqartuunneqarfigisimasaani, pineqaatissiissutip sakkortussusaa isummerfigisussaavaa.
Sermersuup Eqqartuussisoqarfiani arnaq aggustimi ukiuni marlunni pinerluuteqarsimasunut inissiisarfimmiittussanngorlugu pineqaatissinneqarpoq. Unnerluussisussaatitaasulli pineqaatissiissut ingerlateqqippaa, isumaqarami pineqaatissinneqartoq sivikinnerpaamik ukiuni pingasuni pinerluuteqarsimasunut inissiisarfimmiittussanngorlugu pineqaatissinneqassasoq.
Illersuisup pineqaatissiissut sakkukillineqaqquvaa, eqqartuussiviup naliliinera malillugu Pinerluuteqarsimasunik Isumaginniffimmit nakkutigisassanngortillugu, tamatumani imigassamik atuiunnaarsartissinnaanera ilanngullugu. Imaluunniit, tamanna pisinnaanngippat, eqqartuussisoqarfiup ukiunik marlunnik pineqaatissiissutaa Nunatta Eqqartuussisuuneqarfiata aalajangersassagaa.
Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq: