Eqqartuussivimmi suleriusitaaq: Nipit immiussat nalunaarutit allatat taarsersinnaavaat
Allakkatigut nalunaarutit nipinik immiussanik taarserneqarsinnaanerinut inatsimmut nutaamut tapersersiilluartoqarpoq.
Ilisimannittoq imaluunniit unnerluutigineqartoq eqqartuussivimmi ullumikkut nassuiaateqassagaangami, nassuiaat allallugu nalunaarusiarineqartussaavoq. Tamannalu suliaq ilaatigut piffissartornartuuvoq, tamatumalu saniatigut tamakkiisut ilanngutinngitsoorsinnaasarlutik imaluunniit paatsoortoqarsinnaasarluni.
Inatsimmik nutaamik allalluni nalunaarusiat nipinik oqaatigineqartunik immiussinernik taarserneqarsinnaalissapput. Inatsisissatut siunnersuut Inatsisartut tapersernerareerpaat, taannalu maanna Folketingimi suliarineqalerpoq. Illuatungeriillu attuumassuteqartut akornanni tapersiineq siammasimmat, folketingimi politikerit eqqissillutik pisinnaapput.
- Nassuiaatit allaganngorlugit nalunaarutigineqartarneri nipinik immiussanik taarserneqarsinnaalerneri suliarinninnermi pitsanngoriartitsisinnaapput, taamaalillutillu eqqartuussivinni suliani siullerni sullissineq sivikinnerulerluni, Kalaallit Nunaanni Eqqartuussiviit akissuteqaatiminni taama allapput.
Siammasissumik isumaqataaffigineqartoq
Illersuisut akuerisat aamma siunnersuut pitsaasuunerarpaat, tamannalu assigiiaarnerulersitsissasoq isumaqarpoq.
- Eqqartuussisut nassuiaatinik allattuisarnerannut tunngatillugu assigiinngiiaarnerat aamma issuaasarnerisa assigiinnginnerat illersuisut malugigajuttarpaat, minnerunngitsumillu nassuiaatit tamatigut eqqortumik nalunaarutigineqartannginnerat ajornartorsiutinik pilersitsisarnerat, illersuisut peqatigiiffiat Illersuisut tusarniaanermut akissummini taama allappoq. Taamaattumillu inatsisitigut isumannaatsuuneq nukittorsarneqassasoq peqatigiiffik isumaqarpoq.
Nunap illersuisuunerata Finn Meinelip aamma politimesterip Bjørn Tegner Bayip siunnersuut taperserpaat.