eqqusseriaasartut
Eqqartuussivik quliummut tunngasumik suliami aalajangiisoq
Kalaallit Nunaata Eqqartuussisuuneqarfiata arnaq 33-nik ukiulik hashimik eqqusseriarsimasoq ukiup affaa inissiisarfimmiittussanngorlugu maajip 28-ani 2015 aalajangerpaa
Arnap 33-nik ukiullip hashi 930 gram quliutit puuanik poorlugu nassarsimavaa, kisianni hashi mittarfimmi akitsuusiinermut sulisut qimmiannit nassaarineqarpoq.
- Nuannaarutigaara Eqqartuussisuuneqarfiup kredsrettip eqqartuussutaa atuutsimmassuk, aammalu unnerluussisuutitaasut suliamut naliliineranut isumaqataalluni, politiini unnerluussisoq Lasse May oqarpoq.
- Kalaallit Nunaata Eqqartuussisuuneqarfiata pisooqataasup arnamut 33-nik ukiulimmut tunngatillugu nassuiaataa isiginiarpaa, taassumalu nassuiaataa telemit paasissutissanik aamma arnap aningaasaqarnikkut inissisimaffianik uppernarsineqarput, Lasse May tusagassiuutinut naluunaarpoq.
Arnaq illersuisutut suliaqarsimasoq
Eqqartuussisuuneqarfiup aalajangiinera isumaqarpoq, taanna arnaq 33-nik ukiulik ukiup affaa pineqaatissinneqarsimasut inissiisarfianiissasoq, tamannalu nalinginnaasumik hashimik 930 gramimik eqqusseriarnermit pineqaatissiissummit sukannerneruvoq.
- Eqqartuussisuuneqarfiup aaliangiinerani suliami arlalinnik sukannersaataasunik peqarpoq. Ilaatigut ikioqatigiilluni pinerluttoqarmat aamma eqqusseriaanermut misilittagaqarpasimmata - tassani pineqartut attaveqatigiinnertik politiinut toqqorterniarsimammassuk. Arnarlu eqqartuussivimmi illersuisuusimavoq politiillu misissuinermut suleriaasiannut ilisimasaqarluarluni, Lasse May oqarpoq.
Arnaq februaarip naalerneranili tigummigallarneqarpoq, aammalu eqqartuunneqareernerup kingorna tigummineqassaaq pineqaatissinneqartutu inissinneqarluni.