Eqqartuussiviit qullersaanni dommeriusimasoq isumaqatigiissitsiniarnermi Namminersorlutik Oqartussat sinnerlugit isumaqatigiissitsiniaqataassaaq
Namminersorlutik Oqartussat Greenland Mineralsimut isumaqatiginninniarnissamut Poul Søgaard dommerit pingajussaattut toqqarsimavaaat.
Aatsitassarsiutileqatigiiffiup Greenland Mineralsip Namminersorlutik Oqartussat danskillu naalagaaffiat naammagittaalliuutigisimavai, Greenland Minerals isumaqatiginninniartoqarnissaanik tassani piumasaqarsimalluni.
Dommerit pingasut isumaqatigiissitsiniartuussapput, aaqqiagiinngissuteqartut tamarmik dommerimik ataatsimik toqqaassapput, dommerissallu pingajuat isumaqatigiissutigineqassalluni. Dommerit pingajuat siulittaasutut atuutissaaq.
Namminersorlutik Oqartussanit Sermitsiaq.AG-mut ilisimatitsissutigineqarpoq, eqqartuussiviit qullersaanni dommeriusimasoq Poul Søgaard Namminersorlutik Oqartussat danskillu naalagaaffiat sinnerlugit dommerissatut toqqarneqarsimasoq. Poul Søgaard Eqqartuussiviit qullersaanni 1997-imiit 2014-imut dommeriusimavoq, 2014-imiillu 2017-imut Eqqartuussiviit qullersaanni præsidentiusimalluni.
Greenland Mineralsip isumaqatigiissitsiniarnissamik qinnuteqarnermini danskit naalagaaffiat ilanngussimavaa, Greenland Mineralip misissuinissamut akuersissut 2007-imi pissarsiarimmagu aatsitassanut oqartussaqarfik danskit akisussaaffigimmassuk.
Siulittaasussaq isumaqatigiissutigineqangajalersoq
Aatsitassarsiutileqatigiiffimmit Veijo Heiskanen toqqarneqarsimavoq - taanna Finlandimiuuvoq eqqartuussissuserisoq, Schweizimi najugaqartoq.
Veijo Heiskanen isumaqatigiissitsiniarnermik ilisimasaqarluartuuvoq, ukiullu 25-t ingerlaneranni uulisiornerup gassisiorneruullu, aatsitassarsiornerup sanaatornerullu iluini arlaleriaqaluni isumaqatigiissitsiniartarsimavoq. Pineqartoq Linkedin-profilimini taamatut ilisimatitsissuteqarpoq.
Namminersorlutik Oqartussat ilanngullugu ilisimatitsissutigaat, isumaqatigiissitsiniarnermi kina siulittaasuussanersoq pillugu Greenland Mineralsimik isumaqatigiissuteqartoqangajalersoq.
Illuatungeriit tamarmik siulittaasussatut piukkussaminnik pingasunik toqqaasimapput, piukkunneqartullu ilaat ataaseq tamarmik allattorsimaffianniilluni, taamaammat inuk pineqartoq isumaqatigiissutigineqassasoq ilimagineqarluni. Pineqartoq danskiusoq, Aatsitassanut Inatsisinillu Atuutsitsinermut Naalakkersuisoqarfimmit allakkatigut akissuteqarluni oqaatigineqarpoq.
Itigartinneqassasut suli neriuutigineqartoq
Greenland Mineralsimit naammagittaalliuummi tunngavilersuutigineqarsimavoq, ingerlatseqatigiiffik Kuannersuarni suliniummini oqallisaasimaqisumi piiaanissamut akuersissummik piginnaatitaaffeqartoq.
Ingerlatseqatigiiffik piiaanissamut akuersissummik tunineqanngippat, ingerlatseqatiiffiup taarsiiffigineqarnissani piumasariniarpaa, tassani innersuussutigalugu uranimik qalluinissamut inerteqquteqarnerup malitsigisaanik pingitsaaliissummik piiaaqqusinnginnertut tamanna taaneqarsinnaammat Kuannersuarni suliniutip ingerlanneqarnissaa ajornavissisimasoq oqaatigalugu.
Akerlianik aatsitassanut naalakkersuisuusimasup Naaja Nathanielsenip oqaatiginikuuaa, Greenland Mineralsip isumaqatigissitsiniartoqarnissaanik piumasaqarsimanera tunngavissaqanngitsoq, ingerlatseqatigiiffillu suliassaatiminik Kalaallit Nunaanni eqqartuussivimmut suliakkiissuteqartariaqartoq.
Naalakkersuisoqarfimmi Sermitsiaq.AG-mut ilisimatitsissutigineqarpoq, Namminersorlutik Oqartussanit suliamut atatillugu isummaminnik allanngortitsisoqarsimanngitsoq:
- Isumaqatigiissitsiniarnermi dommerit kisimik tamanna aalajangiiffigisinnaavaat, neriuutigaarpullu isumaqatigiissitsiniarnermi tamanna siulliullugu aalajangiiffigineqassasoq, isumalluutinik pisariaqanngitsumik atuinnginniassagatta.