Eqqartuussiviit nukittorsarneranni alloriarneq siulleq
Kalaallit Nunaanni Eqqartuussivik eqqartuussisumik qullersartaartinneqarneratigut eqqartuussiviit nukittorsaqqinneqarnerannut alloriarneq siulliuvoq.
Nunatsinni Eqqartuussisunik Atorfinitsitsisartut innersuussutigaat eqqartuussisup tullia allattoqarfimmilu pisortaq Stig Nørskov-Jensen, København, Eqqartuussisutut qullersatut Kalaallit Nunaanni Eqqartuussivimmi ulloq 1. april 2019 atorfinitsinneqassasoq.
Eqqartuussisumik qullersamik atorfilimmik toqqaasoqarnera, Kalaallit Nunaanni Eqqartuussivimmi eqqartuussisunik marlunnik atorfeqartoqalernissanut siullermik alloriartoqarneranik pissuteqarpoq – aappaa qullersatut atorfeqassammat.
- Eqqartuussivinni siullerni, tassa najukkami eqqartuussivinni aamma Kalaallit Nunaanni Eqqartuussivimmi pitsaassutsimik ineriartortitsinerup nukittorsaqqinneqarnissaanik sulinerup suli nukittunerulerneranik kinguneqassaaq, Kalaallit Nunaanni Eqqartuussivimmi eqqartuussisuugallartoq, Birgit Skriver, Sermitsiaq.AG-mut taama oqarpoq.
Ilaatigut eqqartuussisunik aamma eqqartuussisunngorniat ilinniartinneqarnerat Kalaallit Nunaanni Eqqartuussivimmi marlunnik aalajangersimasunik eqqartuussisoqarnikkut ilaatigut nukittorsarneqassapput.
- Tamatuma saniatigut suliat uninngasut ikilisarneqarnerannik ineriartornermik attassisinnaavugut. Eqqartuussisutut qullersanngortussap aamma taakku marluk pingaarnertut suliassatut isigai.
- Kalaallit Nunaanni Eqqartussivimmi eqqartuussisoqarfinnilu piffissap sulianut atorneqartartup appartinneqarnissaa ukiuni tulliuttuni siornatigutulli pingaartillugu aallunneqassaaq. Sulianik suliaqartarneq pitsanngorsartuassavarput, naleqquttuutittuarlugu, sunniuteqarluartuutittuarlugu qaffasissumillu pitsaassuseqartuartillugu, Stig Nørskov-Jensen, tusagassiuutinut nalunaarummi taama allappoq.
CV-ia annertooq
Angut misilittagartooq atorfinitsinneqarpoq.
Stig Nørskov-Jensen 57-inik ukioqarpoq ukiullu 18-it kingulliit Københavnip Eqqartuussiviani sulivoq, tassani eqqartuussinermut tunngasunik suliaqarnermi saniatigut allattoqarfimmi pisortatut aqutsisunut ilaalluni. Taanna ilaatigut isumannaatsuutitsinermut illuutinillu aserfallatsaaliuinermut akisussaasuuvoq.
Taanna politiinngortigani mekanikeritut ilinniagaqaqqaarpoq. Politiitut sulitilluni inatsisilerituutut ilinniarpoq kingusinnerusukkullu unnerluussisutut sulilluni Domstolsstyrelsenillu sulisoqarnermut immikkoortortaqarfiani ukiualunni sulereerluni 2001-imi eqqartuussivinni sulisalerpoq.
- Danmarkimi eqqartuussiviit annersaanni atorfik kissaatigisimasara qimallugu atorfittaassanni suliassat pingaarutilerujussuit pissanganaqisullu unammillerpakka, taanna oqarpoq.
Stig Nørskov-Jensenip suliassani paasilluarniarlugit Nuummeeqqammerpoq.
- Kalaallit Nunaanni Eqqartuussivimmi eqqartuussisut qullersaattut suliffigisassara pilerigeqisara ullualuit Nuummeereerlunga suli qilanaarinerulerpara.
- Sulisut, suliffeqarfik, suliassat aamma Kalaallit Nunaat ilinniaqqaassavakka. Eqqartuussisoqarfiit aamma Kalaallit Nunaanni Eqqartuussivik 2010-mi eqqartuussiveqarnermik aaqqissuusseqqinnermili pitsaasumik siuariartorsimapput, tamannalu soorunami uanga ingerlateqqissavara.
Suliffimmi avatangiisit ilungersuunniarai
Kalaallit Nunaanni Eqqartuussivimmi atorfinngortussaq eqqartuussisarnermut inatsisip allanngorneqarnissaanut ilaavoq, taanna Folketingimi aamma Inatsisartuni suliarineqarpoq. Pilersaarut malillugu akuerineqarpat, atorfik nutaaq allagartaliunneqassaaq. Eqqartuussisunngortussarlu, Kalaallit Nunaanni Eqqartuussivimmi sulisut sinnerit assigalugit, Stig Nørskov-Jensenip nammineq ilungersuussassaa qilanaarisinnaavaat.
- Ilungersuussama ilagaat suliffimmi pitsaasunik avatangiiseqarnissaq, tamannalumi ineriartortuartoqassappat, siuariartortuartoqassappat minnerunngitsumillu sulisut nalerisimaassappata pisariaqartuusoraara. Ukiamut eqqartuussisunngorniatut ilinniarnerup aallartinnissaa qilanaaraara, taamaalilluta eqqartuussisoqarfinni pikkorissunik sulisoqaannarnissaq qulakkeersinnaassavarput.