Eqqartuussiviit aalajangiisarneri kukkunertaqartut

Uppernanngitsutut nipeqarsinnaavoq: Unnerluussisuutitaasut eqqartuussut sakkukippallaarnera pissutiginagu, kisianni sakkortuallaarneranik isumaqaramik suliassanngortitseqqittut.

Tamanna eqqartuussivinni eqqartuussisoqareernerata kingorna arlaleriarluni taamaattoqarnikuuvoq. Nalunaarusiap Kalaallit Nunaanni inatsisitigut isumannaassuseq, Advokatsamfundetip saqqummersitaata tamanna takutippaa.

Aalajangiinerit kukkunillit
Tamatuma saniatigut aalajangiinerit kukkunertaqartarput.

- Unnerluussisut suliani arlalinni eqqartuussisoqarfinni aajangerneqarsimasut suliareqqitassatut ingerlateqqittariaqarsimammatigit sakkukilliseqqullugit, soorlu pineqaatissiissut pinerluttulerinermi inatsimmut imaluunniit sulieriaatsimut naapertuutinngippat, aammattaaq attumassuteqartut maluginiarpaat, eqqartuussisoqarfiit aalajangigaat Nunatta Eqqartuussivianut ingerlateqqinneqaraangamik allanngortinneqqartartut imaluunniit utertiinnarneqartartut aalajangiiniarnermi tunngavissat amigarineqarlutik, Advokatsamfundet nalunaarusiami allappoq.

Eqqartuussisunik pissarsiniarneq ajornartoq
Eqqartuussisut pikkorissut arlaqartut nalunaarusiami oqaatigineqarpoq, kisianni suliamut pikkorissutsip qaffasissusaa ataatsimut isigalugu appasittoq.

Eqqartuussisunik nutaanik nassaarniarneq kiisalu atorfimmi paariinnarnissaat ajornarnera, nalunaarusiami pissutaasutut taanaeqarpoq. Tamanna misilittagakinnermik, ulapinnermik, tamatumalu kinguneranik ajornerusumik aalajangiinermik kinguneqartitsivoq.

- Suleqatigiissitaq isumaqarpoq, tamanna assut eqqarsarnartoqartoq, aamma maanna Kalaallit Nunaanni eqqartuussiveqarnerup iluani malunnaatilimmik allannguisoqartariaqartoq, inatsisitigut isumannaatsumik illersorneqarsinnaasumillu, ullumikkutut inuinnarnik eqqartuussisoqartarneq ingerlaannassappat, nalunaarusiami allaqqavoq.

Inuinnarnik eqqartuussisoqartarneq kalaallit atugaannut tulluarnerat pissutigalugu, tunngaviusumik Advokatsamfundetip tulluartuusoq isumaqarpoq.

Atuaruk: Siunnersorneqarneq allanngortinneqarpoq

Eqqartuussisoqarfiit ataatsimoortinneqarlik
Eqqartuussisoqarfiit sisamaasut ataasiinnanngorlugu ataatsimuulernissaat, Advokatsamfundetip aaqqiissutitut innersuussutigaa, taamaalilluni ilisimasat nukittorsarneqarniassamata, taamatullu aalajangiisarnerit.

Eqqartuussiveqarfiit videokonference aamma atornerusariaqarpaa, imaluunniit pisariaqartillugu sumiiffinnut orniguttarnissaq.

- Aammattaaq ungasissumi inissisimagaluaraanniluunniit, qitiusumiilluni sumiiffinnut qanittutut misigisimaneq attatiinnarneqarsinnaassaaq, eqqartuussisut Kalaallit Nunaanni pissutsinik oqaatsinillu ilisimasaqarnerat pissutaalluni, tamatumani naatsorsuutigineqarluni sapinngisamik Kalaallit Nunaanni sumiiffinnit tamaneersunik sulisoqalernissaq, nalunaarusiami isummiunneqarpoq.