Eqqartuussissuserisup inatsit unioqqutinneqarsimasinnaasorivaa - kommuni ajunngitsorsiassamik tunniussimmat

Eqqartuussissuserisup allakkiamini inassutigisimavaa, Kommuneqarfik Sermersuumit kommunimi pisortsaanerusimasup Lars Møller-Sørensenip politiinut unnerluutigineqarnissaa eqqarsaatigisariaqaraaa.

Eqqartuussissuserisup allakkiaa ulloq 3. juli suliarineqarsimavoq, tassa borgmesteriujunnaartup Charlotte Ludvigsenip (IA) kommunimi pisortaanerusimasup suliunnaarnissaanik atsiornissaa ullunik marlunnik sioqqullugu. Isumaqatigiissut malillugu Lars Møller-Sørensen suliunnaarnermini 1,3 millioner koruunit sinnilaarlugit ajunngitsorsiassanik tunineqarsimavoq.

Eqqartuussissuserisup allakkiaani Sermtsiaq.AG-mit takuneqarsimassumi allassimavoq, eqqartuussissuserisoqarfik naapertorlugu Lars Møller-Sørenseni kommuni sinnerlugu suliffeqarfimmik PJ Managementimik isumaqatigiissuteqarnermut atatillugu piginnaatitsissumminik unioqqutitsisimasinnaavoq.

Sermitsiaq.AG-p pineqartoq siusinnerusukkut allaaserisimavaa, tassani Lars Møller-Sørensen unioqqutitsinerarsimanngilaq: Paasisaq: Miliuuninik nalilinnik isumaqatigiissuteqarsimasoq politiinut unnerluutigineqartoq. Ilanngutassiamut atatillugu Sermitsiaq.AG-p Lars Møller-Sørensen attavigisimavaa. Taannali suliamut atatillugu maannakkorpiaq oqaaseqarusussimanngilaq.

- Qaqutigoortuullunilu iluaqutaanngitsoq

Eqqartuussissuserisoqarfik allakkiamini Kommuneqarfik Sermersuumut allassimavoq, suliaq imminermini soraarsitsinermik kinguneqarsinnaasoq:

- Isumaqatigiissut qaqutigoorlunilu kommunimut iluaqutaanngimmat isumaqarpunga, kommunimi sulisut isumaqatigiissuteqarsimasut pisussaaffimminnik annertuumik sumiginnaasimasut taamalu pineqartup naammassineqarnissaanut suleqataasimallutik, eqqartuussissuserisoq allappoq, kingusinnerusukkullu nangilluni allalluni:

- Isumaqarpunga pisussaaffimmik sumiginnaasimaneq ima annertutigimmat, sulia imminermini soraartsitsinermik kinguneqarsimasinnaasariaqaraluartoq.

Eqqartuussissuserisup Sulisunut Piginnaatitsinermullu Aqutsisoqarfimmi Sulisut Allaffissornerannut Ilitsersuut soraarsitsinissamut atatillugu innersuussutigaa, taannalu isumaqarpoq, kommuni piffissami sivisuumi "sullinneqarani aningaasatigut isummannaarneqanngitsumik" pisussaaffilerneqarsimammat piumasaqaatit naammassineqarsimasut.

Professori: Kommunip soraarsitsinissaq eqqarsaatigisariaqarsimagaluarpaa

Sermitsiaq.AG-mit uppernarsarneqarsinnaasimanngilaq, Lars Møller-Sørensen isumaqatigiissuteqarfigineqarmat allakkiaq Kommuneqarfik Sermersuumit ilisimaneqarsimanersoq.

Universitetimili aningaasaqarnermik aqutsinermi professorip Per Nikolaj Buhkip eqqartuussissuserisup allakkiaa atuarneqarsimavoq, taassumalu oqaatigaa kommunip allakkiamik ilisimasaqanngissimanissaa eqqarsaatigiuminaattoq imaluunniit unnerluussutit ilungersunartut eqqarsaatigalugit taamatut ittunik takkuttoqarsinnaaneranik ilisimasaqanngissimasinnaanera eqqarsaatigiuminaattoq.

Professori naapertorlugu, allakkiami pasilliutigineqartut ima ingasatsigipput, allaat kommunip soraarnermi ajunngitsorsiassaqartitsinertaqanngitsumik soraarsitsinissaq eqqarsaatigisimasinnaasariaqarsimagaluarpaa.

Professorilli aamma oqaatigaa, soraarsitsineq kommunimut malunnaatilimmik kingunerlutsitsisimasinnaasoq:

Eqqartuussivilersuunneqarsinnaasoq

- Kommuni eqqartuussivimmut suliassanngortinneqarsimasinnaagaluarpoq, naggataatigullu soraarsitsinermut, eqqartuussissuserisumut aningasartuutigisanut kommunimilu pisortaasimasumut taarsiissutissanut akiliuteqartussaasimassagaluarluni, Per Nikolaj Bukh oqarpoq.

Professorimit maluginiarneqarsimavoq, Lars Møller-Sørensen atorfinitsinneqarnermi isumaqatigiissut malillugu qaammatini 18-ini aningaasarsiaqartinneqarnissamut piumasaqaatasut naapertorlugit aningaasarsiaqartinneqartussaagaluarluni, suliunnaarnissamik isumaqatigiissummi aningaasarsiaqartinneqannginnera. Kommuni taamaalilluni pisortaanerusimasumik isumaqatigiissuteqarnermini akikinnerulaartunik aningaasartuuteqarsimavoq, Lars Møller Sørenseni suliunnaarami kommunimit "taamaallaat" qaammatini aqqaneq-marlunni aningaasarsiaqartinneqartussaasimammat.

Lars Møller-Sørensen 2021-mi juulip qaammataata aallartinnerani suliunnaarpoq. Suliunnaarneraniillu qaammatit arlallit aatsaat qaangiummata Kommuneqarfik Sermersuumit nalunaarutigineqarpoq, sulisuusimasut ilaat kommunimi aqutsinermi pasinartunik suliaqarsimasutut politiinut unnerluutigineqarsimasut.

Tamatumalu kingorna qaammat ataaseq sinnilaarlugu ingerlareersoq Sermitsiaq.AG-mit saqqummiunneqarpoq, politiinut unnerluussisisimanermut PJ Managementimut isumaqatigiissuteqarsimaneq pissutaasoq. Kommuni suliffeqarfiup kiffartuussineranut, kommunip isumaa malillugu isumagineqarsimanngitsumut 2,7 millioner koruunit missaannik akiliuteqarsimavoq.

Kommunip suliffeqarfimmut isumaqatigiissut atorunnaarsissimavaa, suliffeqarfiulli nalunaarutigisimavaa, isumaqatigiissummik atorunnaarsitsineq seks millioner koruuninik taarsiifigitinnissamik piumasaqaateqarfiginiarlugu.