Eqqartuussissuserisunngorlaaq soraarummeernissani sioqqullugu atorfinippoq

Ukiut tallimat ilinniareernermi kingorna Sika Lange eqqartuussissuserisutut imminut taasinnaanngorpoq. Aggustip aallaqqaataani Naalakkersuisuni atorfinissaaq.

Sika Lange Nielsen sisamanngornermi ualikkut ukiuni tallimani ilinniareernmi kingorna eqqartuussissuserisunngormat, nuannaarneq malugineqarsinnaavoq.

- Kiisami eqqartuussissuserisunngorpunga, kandidatinngorlaaq inimit soraarummeerfimminit anillakkami taama oqarpoq.

Inaarutaasumik soraarummeerneq Aalborg Universitetimi pivoq, tassani Sika Langep inatsisilerinermi specialini illersorpaa – kalaallit attartortut oqoqarnermut tunngatillugu inatsisitigut inissisimanerat pillugu ilisimatuutut allaatigisaq. Specialimi Sika Lange 10-mik karakterimik tunineqarpoq, maannakkullu eqqartuussissuserisutut imminut taasinnaanngorpoq.

Taaguut nalliuttorsiutigineqassaaq

Maanna taaguutitaava ilinniaqatigisallu aamma Aalborgimi kalaallit ikinngutit peqatigalugit nalliuttorsiutigineqassaaq. Kingorna Nuummut aappaminullu Jakobimut angerlassaaq. Eqqartuussissuserisunngorlaaq 28-nik ukiulik aggustip aallaqqaataani Atuisunut Unammilleqatigiinnermullu Aqutsisoqarfimmi Naalakkersuisuni atorfinissaaq.

Ilinniarneq North Atlantic Law Programmemik taasap ataani ingerlanneqarpoq, kalaallit ilinniartut Kalaallit Nunaanni aasaanerani juullikkunilu sulinngiffeqarfiup nalaani misilitsinnissamut periarfissillugit aaqqissugaasoq.

Taanna aamma allattariarsorluni suliassarpassuit ilaasa Kalaallit Nunaanni allannissaannut periarfissiivoq.

- Tassunga tunngatillugu Kalaallit Nunaanniinneq iluaqutissarujussuuvoq, inatsisilerinermi tusarfiit soorlu eqqartuussutinut allanngortinnerit pissarsiariuminarnerunerat pissutigalugu, Sika Lange nassuiaavoq.

Oquk

Sika Langep specialiliamini kalaallit inissiaanni oqummik annertuumik ajornartorsiuteqarneq ukkataraa.

- Kalaallit attartortarnermut inatsisaat amigarpoq, tassami attartortut oqoqartillugu inatsisitigut pisinnaatitaaffii aalajangersimasumik sammineqanngimmata. Kisianni attartortut arlalinnik pisinnaatitaaffeqartut paasivara, taamaalilluni oqoqarnera pissutigalugu napparsimalersimagaanni attartornermut akiliut imaluunniit taarsiiffigitinnissamut periarfissaqarpoq, Sika Lange oqaluttuarpoq, taassuma inerniliussani inatsisini allattorsimanngitsunik aamma danskit attartornermut inatsisaannik aallaaveqarluni allaaserinnissimavoq.

Powered by Labrador CMS