aalisarnermut inatsit

Eqqartuussissuserisoqarfik: Pisassiissutit allanngortinneqarnerat ukiut 25-it sioqqullugit kalerriutigineqartassaaq

Raajanut aamama qaleralinnut pisassiissutit killiligaanngitsut atorunnaarsinneqarneri minnerpaamik ukiut 25-t piffissaliullugit kalerriutigineqartassasut, eqqartuussissuserisoqarfik Gorrissen Federspiel 13-nik quppernilimmik oqaaseqaateqarnermini naqissusiivoq. Pisassiissutit amerlanerusunut siammarterneqarnissaat, Kim Kielsenip ammaanersiornermi oqalugiarnermini oqaatigaa.

Kim Kielsen sagde i sin åbningstale, at ejerskabet til rejer- og fiskekvoterne skal fordeles til flere aktører i samfundet.

Aalisarnermut inatsisissamut siunnersuummut assortuussutaasumut oqaaseqaatini, minnerpaamik ukiut tallimat sioqqullugit kalerriisoqartarnissaa allaqqavoq. Inatsisissatullu siunnersuut taamaatsillugu akuerineqassapput, milliardilikkaanik taarsigassiinissamut suliakkiisoqarniarpasippoq.

Pigisanik piginnikkunnaarsitsineq
Namminersorlutik Oqartussat raajanut qaleralinnullu pisassiissutit killiligaanngitsut utertinneqarnissaannut imaluunniit allanngortinnissaanut pisinnaatitaanersut, Sulisitsisut eqqartuussissuserisoqarfimmut nalilersortippaat, kiisalu Namminersorlutik Oqartussat akuersissutit pineqartut utertinneqassappata taarsiiffigitinnissamut periarfissanik ujartuitinneqarpoq.

Akuersissutit pigisanut pisinnaatitaaffinniittut Gorrissen Federspielimit nalilerneqarpoq, taakkulu Tunngaviusumik Inatsit malillugu pinngitsaaliissummik arsaarinnissuteqarnermut, aamma Europami Inuit Pisinnaatitaaffiinut Isumaqatigiissummi malittarisassanut ilassummit illersorneqarput.

Eqqartuussiviit qullersaannut unnersuussisoq
- Kalerriuteqarneq minnerpaamik ukiunik 25-nik siusinaarluni pisassasoq nalilerparput, tamannalu aamma Norgemi eqqartuussiviit qullersaanni 2013-imi aalajangiinermit taperserneqartumut assersuunneqarsinnaavoq.

Eqqartuussissuserisut aalisarnermut inatsimmut siunnersuutip kingunissaanik misissuilluarsimasoq annaasaqarnissaq pillugu allappoq, ''maanna isertitanut aamma aalisarnerup ineriartornissaanut naatsorsuutinit paasissutaatigut naapertorlugit milliardilippassuarnik annaasaqaataassasut'' tunngavigineqarsinnaapput.

Eqqartuussissuserisoqarfik Danmarkimi ataqqineqarnerpaat ilagaat, pisortat aamma inuussutissarsiortut namminersortut akornanni pigisanik arsaarinninnermut assortuussutaasunut suliaqartarsimavoq.

Kim Kielsenip ammaanersiornermi oqalugiaataa
Kim Kielsenip Inatsisartut ukiakkut ataatsimiinnerisa ammaanersiornermut oqalugiarnera ilutigiinnangajallugu oqaaseqaat tusagassiorfinnut nassiunneqarpoq.

Kim Kielsen Naalakkersuisunut siulittaasoq, aalisarnermut inatsisissatut siunnersuut pillugu oqarpoq:

- Naalakkersuisut kissaatigaat pisassiissutit ingerlatseqatigiiffiillu piginnittuisa inuiaqatigiinni amerlanerusunut siammarneqarnissaat, pisassiissutinik piginnittut qummut killilertarnerisigut aqunneqarsinnaasunik. Inatsimmut allannguutissat ilaat aalisarnermut inatsit nutaaq aqqutigalugu aappagumiit ingerlaannaq atuutsilersinneqassanngillat, aatsaat kingusinnerusukkut piareersarnissamut piffissaqartitsilluarluni nalunaarutit aqqutigalugit atuutsilersinneqarumaaramik.

Erseqqinngitsoq
Kim Kielsenip aalisarnermut inatsisissatut siunnersuut erseqqissumik oqaaseqarfiginngilaa, kisianni ataatsimut anguniagaq politikkikkut suli atuuttoq oqaatigalugu: raajanut aamma aalisakkat pisuussutit amerlanerusunik piginnitseqalernissaannik qulakkeerinninnissaq.

Aalisarnermut inatsimmut siunnersuummut tusarniaanermut akissuteqarnissaq ullumikkumut killeqarpoq.

Powered by Labrador CMS