Eqqartuussisoqarfiup eqqartuussutaa: Aningaasat aningaasanik paasiuminaallisakkanik tunisaqarnermeersuupput
Pinerluttulerinermik suliami 110.000 koruunit missaannik nassaarnermut tunngasumi, unnerluussisup eqqartuussisoqarfimmut aningaasat ikiaroornartumik nioqquteqarnermeersunerannik qularunnaarsilinngitsoorpaa. Unnerluutigineqartoq oqarpoq, aningaasat bitcoininik nioqquteqarnermeersuusut.
Eqqartuussisoqarfiup unnerluutigineqartoq aningaasanik unioqqutitsilluni annisseriarsimasutut eqqartuuppaa aningaasallu arsaarinnissutigalugit. Eqqartuussut suliareqqitassanngorlugu ingerlateqqinneqarpoq, taama aviisi AG allappoq.
Nunatta Eqqartuussisuuneqarfiata 109.850 koruunit ikiaroornartumik hashimik 109 grammimik politiit isumaqarnerattut tunisaqarnermeersuunersut imaluunniit unnerluutigineqartup oqarneratut bitcoininik tunisaqarnermeersuunersut naliliiffigisussanngorpaa.
Aningaasarpassuarnik silaannaarlugit poortukkanik, unnerluutigineqartup skuuini Kangerlussuup Mittarfiani apriilimi 2018-imim nassaanik, suliaq Sermersuup Eqqartuussisoqarfiani sapaatip-akunnerani kingullermi suliarineqarmat, kredsdommer Virna Kromann eqqartuusseqataalu marluk aalajangerput kingulleq upperiniarlugu.
- Nalornineq unnerluutigineqartumut iluaqutissanngortittariaqarparput, uppernarsaatissat kivinneqarsimanngimmata. Bitcoininik nioqquteqarneq inatsisinik unioqqutitsinerunngilaq, aamma aningaasa allameersuunerannut uppernarsaatissaqanngilaq, eqqartuussisosqarfik aalajangiinerminut tunngavilersuivoq.
Unnerluutigineqartoq taamaalilluni ikiaroornartumik hashimik nioqquteqarsimasutut ikiaroornartulerisimasutullu pinngitsuutinneqartoq, taamaattoq angut 33-nik ukiulik Namminersorlutik Oqartussat nioqqutissanik eqqussinermut annissinermullu nalunaarutaannik unioqqutitsisimasutut pisuutinneqarpoq. Tassani allassimavoq, aningaasanik 50.000 koruunit sinnilinnik annissinissaq inerteqqutaasoq, oqartussanut tamatuminnga paasissutissiisimanngikkaanni.
Eqqartuussisoqarfiup unnerluussisup piumasaqaataa malippaa aningaasallu tamaasa arsaarinnissutigalugit, tamatumanilu tunngavilersuutigineqarluni, cigarettinik kartonimik sippuisimaneq pillugu ilanngaaserisunit paasisagaanni, kartonit marluutillugit arsaarinnissutigineqartartut. Tamatuma saniatigut 33-nink ukiulik 5.000 koruuninik akiliisinneqartussatut eqqartuunneqarpoq.
Eqqartuussineq pillugu uani AG-imi paasisaqarnerugit: