Eqqartuussinermi illersuisoq Ombudsmanditut qinerneqartoq
Gedion Jeremiassen nunatsinni eqqartuussinerni illersuisutut ukiuni 30-ni misilittagaqartoq, 1. august aallarnerfigalugu Ombudsmanditut atuuffeqalissaaq. Taassuma Vera Leth, soraarninngortussanngortoq, paarlassavaa.
Vera Leth Inatsisartut Ombudsmandiatut ukiuni 26-ni atuuffeqareerluni soraarninngortussanngorpoq.
Inatsisartut upernaakkut ataatsimiinnertik naggaserlugu paarlatsissaanik ullumi taasipput. Gedion Jeremiassen, 61-inik ukiulik Ombudsmandinngussaaq.
- Inatsisartut tatiginninnerat soorunami attortissutigaara. Akisussaaffik annertoorujussuaq, Vera Lethip pitsaalluinnartumik suliarisimasaa tigusussanngorpara. Maniguullunga ilungersorlungalu suliaq tigussavara, Gedion Jeremiassen Sermitsiaq.AG-mut oqarpoq.
Taanna 1. august Ombudsmanditut atuuffeqalissaaq, Vera Leth soraarninngorpat.
Inatsisileritooq ukiuni 30-ni misilittagaqartoq
Gedion Jeremiassen Københavnip Universitetianit cand.jur.-itut ilinniagaqartoq ullumikkullu inatsisilerituutut namminersortutut aammalu nammineq aningaasartuutiginngisamik eqqartuussisulersuussisoqarnerani eqqartuussissuserisutut sulilluni.
Suleriaaseq pillugu Ataatsimiititaliap, Inatsisartut partiivinit tamanit ilaasortaaffigineqartup peqataatinneratigut, Inatsisinut Ataatsimiititaliap inassuteqarneratigut Ombudsmandimik qinersisoqarpoq.
- Qinnuteqartup matumap inatsisilerinermi naammassisai kiisalu pisortat allaffeqarfiini eqqartuussivinnilu ukiorpassuit misilittagaqarnera Inatsisinut Ataatsimiititaliap matumani inassuteqaammik suliaqarnermini pingaartissimavai. Innarligassaanngitsumik isummertaaseqartutut, siammasissumik misilittagaqartutut, inuttut malunnaateqartutut, illoqarfinnillu nunaqarfinnillu annertuumik ilisimasaqartutut ataatsimiititaliap qinnuteqartoq isigaa.
- Atorfinitsitsiniarnerup ingerlanerani Ombudsmandeqarfimmut annertuumik ataqqinnissuseqarnini kiisalu Ombudsmanditut atuuffiup ineriartornissaanut takorluukkani ersersippai, Anders Olsen Inatsisinut Ataatsimiititaliap siulittaasua oqarpoq.
Eqqartuussivimmi ukiuni 30-ni illersuisutut inissisimareerluni, maanna Ombudsmanditut atuuffeqalernissani qilanaaralugu, toqqarneqartup Sermitsiaq.AG-mut oqaatigaa.
