Eqqartuussineq: Porno aqqutigalugu akiniaasoqarneranik suliaq siulleq
Angut 24-nik ukiulik niviarsiaqqap assinganik siammarterisimasutut pineqaatissinneqarpoq. Nunatsinni siullerpaamik taamaattumik suliaqartoqarpoq
Angut niviarsiaraq pineqartoq aapparisimavaa, atoqatigiinneranni videokkut immiussimallugu.
15-nik ukiulik
Eqqunngitsuliorfigineqartoq pisumi 15-nik ukioqartoq, illersuisussaaneq Emil Maegaard-Hoffmann tusagassiutinut nalunaarummi allappoq.
Aappariikkunnaareernermi kingorna pornohjemmesideni pineqaatissinneqartoq videonik marlunnik ikkussaqarpoq.
Suliassanngortinneqaqqittoq
Angut pinngitsuunerarpoq, kredsrettimiilli ulluni 40-ni isertitsivimmiinnissaa aalajangiunneqarluni, 10.000 koruuninik aamma niviarsiaqqamut akiligassinneqarluni. Kredsrettip eqqartuussutaa Nunatta Eqqartuussivianut ingerlateqqippaa.
Nunatta Eqqartuussiviata kredsrettip eqqartuussutaa ilalerpaa, akiligassaq 20.000 koruunimut qaffallugu.
Akiniaaneq
Nunatsinni taamaattumik aatsaat eqqartuussisoqarpoq.
- Eqqartuussut naammaginartipparput. Taamaattunik videolianik siammarterineq qanoq inunnut ajoqqusiisinnaasoq kredsrettip Nunattalu Eqqartuussiviata ilalerlugu eqqartuussineq naammassineqarpoq. Taamatut isiortoq isertitsivimmi parnaarunneqartussanngorneranik eqqartuussineq nuannaarutigaarput, oqarpoq.