Eqqartuussineq: Partiimi allattaasimasoq peqquserlussimasutut unnerluutigineqarpoq
Atassummi allattaasimasoq 6. maj eqqartuunneqartussanngorpoq. Pineqartoq aningaasat 138.000 koruunit nalinginut peqquserlussimasutut unnerluutigineqarluni eqqartuussivimmi sassartinneqartussanngorpoq.
Atassutip allatsigisimasaa Sermersuup eqqartuussiviani ullumi sisamanngornermi 6. maj sassartinneqartussanngorpoq.
Pineqartoq pinerluttulerinermi inatsimmi §106 aamma §107-imik unioqqutitsisimasutut, tassa aningaasanik peqquserlussimasutut aamma piginnaatinneqarnini qaangerlugu peqquserlussimasutut unnerluutigineqarsimavoq.
Atassutip maanna siulersuisuunerisa Sermitsiaq.AG-mut uppernarsarnikuuaat Atassutip siulersuisuunerisimasaasa, tassa Siverth K. Heilmann siulittaasuungallarmalli, pineqartoq politiinut tunniussimagaat aningaasanik peqquserlussimanerarlugu. Partiip siulersuisui 2019-imi novemberimi nutaanngorput.
138.000 koruunit
Unnerluussut naapertorlugu partiip allatsigisimasaa piffissami ukiup ataatsip iluani "partiimi allatsitut atorfeqarnermini tatigineqarluni partiip kontoanut isersinnaalluni, peqquneqarani katillugit kr. 138.000,-it imminut tunniuttaramigit" unnerluunneqarpoq.
Aningaasat nutserinermi tapitut taaneqarsimapput partiillu siulersuisuiniit akuerineqarsimasaratik.
Pineqaatissinneqarsimasut inissiisarfianni
Sermersuumi eqqartuussiviup uppernarsaatit tunngavilersorluagaanerarpagit taamatullu unnerluussisussaatitaasut piumasaat malissappagu, partiimi allattaasimasoq pineqaatissinneqarsimasut inissiisarfianni ulluni 60-ini pineqaatissinneqartussanngussaaq. Unnerluussummi allassimanngilaq partiimut akiitsorineqartut akiligassanngortinneqassanersut.
Unnerluunneqartup illersuisua Sermitsiaq.AG-mut ilisimatitsivoq unnerluunneqartoq pinngitsuunerartoq, taamatullu suliami iperagaanissaq illersuisup piumasarissagaa.