Eqqartuussineq ullumikkut aallartissaaq: Unnerluussut pinerlunnernik 50-inik imaqarpoq
Angut pisunut 50-inut unnerluutigineqarpoq, toqutseriarneq, serlersaarineq, politiinut savimmik miloriussineq, peqquserlunneq, arnanut nakuuserneq qaqqami kinguaassiutitigut kannguttaalliorneq ilanngullugit. Taanna siornatigut pineqaatissinneqarsimavoq, kisianni pineqaatissinneqarnera sakkortusineqartariaqarpoq, unnerluussisussaatitaasoq piumasaqarpoq.
Toqutseriarneq, nakuuserneq, kannguttaatsuliorneq, peqquserlunneq aamma serlersaarineq. Unnerluussisussaatitaasut naapertorlugit angut 50-init ikinnerunngitsunik 2020-miilli pinerluttuliorsimavoq. Allakkami unnerluussummi Sermitsiaq.AG-p takusaani tamanna atuarneqarsinnaavoq.
2021-mi marsimi angut qaammatini arfineq-pingasuni nakuusersimanerminut sioorasaarisimanerminullu pineqaatissinneqarsimasut inissiisarfianiittussanngortinneqarpoq. Maanna ukiut marluk qaangiuttut unnerluussut nutaaq amerlanerusunik inatsisinik unioqqutitsiffiusoq naapertorlugu, Eqqartuussisoqarfik Sermersuumi pineqaatissinneqarnerata sivitsorneqarnissaa piumasarineqarpoq, taarsiullugu ukiuni sisamani qaammatinilu arfinilinni pineqaatissinneqassasoq.
'Toqussavakkit'
Allagaq unnerluussut naapertorlugu, angut 13. oktober 2022-mi inummik nujaatigut nusussivoq, kingornalu taanna sakiaatigut savimmik kitserummik pingasoriarlugu kaperiarpaa. Pinerlineqartup saassussinera pinngitsoortippaa, kisianni angummit malersorneqarpoq, taassumalu qulinit ikinnerunngitsunit taanna sakiaatigut kaperiarpaa. 'Toqussavakkit', angut pisumi taama oqarpoq.
Ullormi tassani allagaq unnerluussut naapertorlugu politiinut marlunnut vodkap puiaasartaanik milloorsimavoq, taakku peqillutik eqqorneqanngillat. Tamatuma kingorna angut savilerluni tungaannut arpappoq. Aarlerisaarutaasumik igittoqarmat unippoq, kisianni savimmik politiit tungaannut miloriussivoq. Angutip tigusarineqarnerata kingorna oqarsimavoq: 'Takussavarsi, aniguma utaqqilaaritsi'.
Nakuuserneq aamma kannguttaatsuliorneq
Angut aamma siornatigut arnap niaquanik atortumut minnerpaamik tallimariarluni Nuummi adressemi aportaartitsisimavoq. Ukiut marluk qaangiuttut Paamiuni assingusumik iliuuseqarpoq, tassani 9. juli 2022-mi arnaq kiinaatigut arlaleriarlugu tilluppaa. Angutip nujaartorpaa, inussaminillu qaniatigut tigoriarlugu nutsuppaa, taamaalilluni qanimigut kilerneqalerlunilu timimigut tilluusarpoq.
4. juni qaamat sioqqullugu Paamiuni qaqqami arnamut kannguttaatsuliorpoq, tassanilu unnerluussut naapertorlugu uppataatigut kinguaassiutaatigullu atisaata qaavatigut attorsimavaa.
Pisiffimmi annertuumik peqquserluttuliorneq
Pisut 50-init 41-t Pisiffimmi peqquserlunnermut tunngasuupput, tassani angut pingaartumik kortinik oqarasuaatinut immiissutinik aamma cigarettinik poortanik arlalinnik suliffeqarfiup kontoanik peqquserlulluni taasilluni pissarsisarsimavoq.
Pineqaatissinneqarnerata sakkortusineqarnissaata saniatigut, angut Pisiffimmut taarsiilluni 55.156 koruuninik akiliissasoq, aamma arnamut qaqqami kannguttaatsuliorfigineqartumut 5.000 koruuninik taarsiissasoq, unnerluussisussaatitaasut piumasaqarput.