Eqqakkat: Esani Kommuni Kujallermik oqaloqateqartoq

Kommunit eqqagassalereqatigiiffiat Esani Kujataani eqqakkanik isumaginnittarneq pitsanngorsaaffiginiarlugu Kommuni Kujallermik oqaloqateqartuarpoq. Eqqagassalereqatigiiffik eqqakkanik isumaginnittarnerup qanoq pitsaanerulersinneqarsinnaanera pillugu sapaatip akunnerani tullermi siunnersuuteqarniarpoq.

Kommunit eqqagassalereqatigiiffiat Esani Kommuni Kujallerlu eqqakkanik isumaginnittarnerup qanoq pitsaanerulersinneqarsinnaanera pillugu sisamanngorpat ataatsimeeqatigiinniarput.

Eqqagassalereqatigiiffimmi pisortaq Frank Rasmussen Sermitsiaq.AG-mut ilisimatitsivoq.

- Kommune Kujalleq Kujataani eqqakkanik isumaginninnissamut akisussaasuuvoq. Qanoq iliortoqartariaqarnera pillugu oqaloqatigisarpavut. Eqqakkanik isumaginnittarnerup qanoq allanngortinneqarsinnaaneranut periarfissarpassuaqarpoq, taanna oqarpoq.

Esani eqqakkanik qanoq poortuisoqarsinnaanersoq ilitsersuisassaaq, aamma nunaqarfinni. Esani kommunimik ataatsimeeqateqaleruni kommunimut inassuteqaateqassaaq.

Containerit matoqqasut

- Tamatuma kingorna kommunip nammineq nalilissavaa, siunnersuutitsinnik atuutsitsilissanerluni. Assigiinngitsunik siunnersuuteqassaagut, assersuutigalugu containerit matoqqasut sumi atorneqarsinnaanersut, qaammammut ataasiarluni taakkunannga sumut aallertoqarsinnaanersoq. Tamakkuli atuutsinneqalissappata kommuni sulisussamik pissarsisariaqarpoq, eqqakkanik isumaginnittussamik, taanna oqarpoq.

Inatsisartut Eqqissisimatitsinermut Avatangiisinullu Ataatsimiititaliaat aggustip qaammataata naanerani angalasimapput, ilaatigut Qassiarsunniissimallutik.

- Eqqakkanik isumaginnittarneq kinguussaasimaqaaq, ataatsimiititaliami siulittaasup tullia Aqqa Samuelsen (IA) ilaatigut Sermitsiaq.AG-mut oqarsimavoq.

Powered by Labrador CMS