Eqqakkat isumagineqartussanngorput

Nunatsinni kommunit tallimaasut isumaqatigiissuteqarlutik ataatsimoorussamik eqqagassaleriffimmik pilersitsipput, nunatsinni eqqagassat ullumikkumut naleqqunnerusumik suliarineqartalernissaat anguniarlugu.

Eqqaavilerinermut tunngatillugu mumisitsisoqalerpoq. Kommuneqarfik Sermersooq tusagassiutinut taama nalunaaruteqarpoq.

Taama ersaritsigisumik nalunaarnermi tunngavilersuutigineqarpoq nunatsinni kommunit tallimaasut tamakkerlutik eqqagassaleriffimmik, ESANI A/S (Eqaavilerineq Sulisoqarneq Atoqqiineq Nukissiuuteqarnermilu Ingerlatseqatigiiffik), nunatsinni eqqanik pitsaanerusumik avatangiisinullu mianerinninnerusumik suliarinnittussamik pilersitsimmata.

- Ullumikkut illoqarfippassuit nunaqarfippassuillu kusanaatsortaqartarput. Tassaallutik eqqaavissuit ukiorpassuarni annertusiartortartut, tamannali allanngortinniarneqalerpoq, kommuni tusagassiutinut nalunaarummi allappoq.

Ikuallaaviit marluk

Eqqagassaleriffiup ilaatigut ikuallaaviit marluk ingerlatissavai, Nuuk Sisimiullu ikuallaaveqartinneqassallutik. Taakkua nuna tamakkerlugu illoqarfinniit nunaqarfinniillu eqqagassanik tigooraaffiussapput.

Eqqagassaleriffimmik pilersitsinissamut isuma nutaajunngilaq. Naalakkersuisut borgmesterillu septembarimi 2018-imi ataatsimoorlutik isumaqatigiipput kommunit ataatsimoorlutik eqqagassaleriffeqalissasut.

Naalakkersuisut suliniummut 6 milliuunit koruuninik tapersiissallutik nalunaaruteqarput, kommunit ikuallaavinnik quersuaqartunik, ullumikkumut tulluarnerusunik mingutsitsinnginnerusunillu peqalernissaat anguniarlugu. Ikuallaaviit ikuallassinnaasaat 30 procentimik sinnerlugit nunatsinni eqqagassanik ullumikkut pilersitsisoqartarpoq.

Ingerlatsiviup pisortaagallartunngortup, Frank Rasmussenip suliassaq nutaaq nuannaarutigaa.

- Nalunngilara eqqumiitsoq, eqqagassalerineq pilerigisarsimagakku, kisianni suliassaq pissanganarluinnartuuvoq, nunalu tamakkerlugu aningaasaqarneq avatangiisillu eqqarsaatigalugit iluaqusiisinnaalluni, eqqagassaleriffimmi pisortaagallartoq, Frank Rasmussen tusagassiutinut nalunaarummi oqarpoq.

Aningaasartuutit assigiit

Ingerlatsivik kommuninit ingerlanneqartussaanera pissutigalugu, kommunit tamarmik Nuummut Sisimiunulluunniit eqqagassanik nassiussisarnerannut aningaasartuutit assigiitinneqassapput.

- Imaappoq assersuutigalugu Avannaata Kommuniata eqqakkat ataatsit iginniarunigit Qeqqata Kommuniata akiligassaanit amerlanerunavianngillat, Kommuneqarfik Sermersooq allappoq.

Ingerlatsivimmi pisortaagallartup ilanngullugu ilisimatitsissutigaa illoqarfinni eqqagalerinermik suliaqartut suliffissaarunnissaat naatsorsuutiginagu.

- Illoqarfinni mikinerusuni nunaqarfinnilu immikkoortiterinermut poortuinermullu sulisunik atorfissaqartitsiuassaagut. Ileqqaarutissaq tassaavoq nuna tamakkerlugu eqqakkanik ikuallaasarnikkut kissamik atorluaalersinnaagatta, taamannalu naleqassutsinik annertusititsissallun i, Frank Rasmussen oqarpoq.

Sisimiuni ikuallaavik nutaaq 2022-mi naammassineqarnissaa Nuummilu ikuallaavik 2023-imi naammassineqarnissaa naatsorsuutigineqarpoq.

Powered by Labrador CMS