pinngortitaq avatangiisillu

Eqqakkat aqunneqarsinnaanerulissapput

Avatangiisit pitsaanerulernissaat anguniarlugu Namminersorlutik Oqartussat Kommune Kujallerlu isumaqatigiissusiorput

Aqqusinerni, eqqaavissuarni eqqakkat imaani avatangiisitsinni mingutsitsisut, ikuallaaviit amerlavallaat ingerlalluanngitsut – avatangiisinut suliassaqarfimmi unammilligassat amerlasoorpassuupput annertullutillu.

Maannakkulli tamanna pillugu suliassamik aallartitsoqarpoq.

Kim Kielsen aamma Kommune Kujallermi borgmesteri Jørgen Wæver Johansen politikkikkut siunertanut nalunaarut kommunini isumannaatsumik eqqagassalerinermut aqqutissiuussisussaq atsiorpaat.

Siunertanut nalunaarut Kommuni Kujallermi eqqaavissuarni saliinermik aammalu isumannaatsumik ikuallaasarnermut aaqqiissutissanik pilersitsinermik kinguneqassaaq, tamatumalu kingorna suleqatigiinnermit misilittakkat nuna tamakkerlugu ullutsinnut naleqqunnerusumik isumannaannerusumillu eqqagassalerisarnermut tunngavissaliissapput.

Avatangiisit pitsaanerusariaqartut
- Eqqagassalerineq kommunit akisussaaffeqarfigaat, kisianni kommunit kisimik suliassarujussuaq taanna isumagissanngilaat, uangalu peqqinnissamut peqqissusermullu ulorianartorsiortitsisumik innuttaasunut qanilluinnartumi ammaannartumik ikuallaasoqartarnera akuerisinnaanngilara. Isumaga malillugu pinngortitaq najugarput asseqanngilaq, taannalu paarissavarput. Peqqissuserput pinngortitarlu eqqarsaatigalugit malugineqarsinnaasumik avatangiisini pitsanngorsaanernik pilersitsinissaq tassa nukinginnarluinnarpoq, Avatangiisinut Pinngortitamullu Naalakkersuisoq Kim Kielsen tusagassiutinut nalunaarummi oqarpoq. Tusagassiivik nalunaarpoq.

Kim Kielsen-ip Avatangiisinut Pinngortitamullu Naalakkesuisutut akisussaaffik novembarimi 2013-mi tigummaguli eqqagassalerinerup iluani suliniutinik aalajangersimasunik allartitsinissamut suliaqarneq ingerlanneqarpoq. Suliaqarneq taanna ilaatigut Kanukoka qanimut pilersitsiviulluartumillu oqaloqatigalugu pivoq.

Powered by Labrador CMS