Eqqagassalerisut pisortaat: RAL piviusorsiunngilaq

- Royal Arctic Linep tusarniaanermut akissuteqaammini piviusorsiunnginnera tupaallaatigaara, kommunit eqqagassalereqatigiiffianni Esani A/S-imi pisortaq Frank Rasmussen erseqqissaavoq.

Navianartunik naliliineq

Royal Arctic Line tusarniaanermut akissummini allappoq, nerisassatut tunisassiat ikuallaaviup eqqaani usigiarneqartassappata, avammut tunisartakkat nalikillisinnaasut. Umiarsuaatileqatigiiffiup taamaalilluni nalilersimavaa, avammut tunisartakkat 5%-imik nalikillissappata, ukiumut 175 millioner koruuninik naleqartassaasut.

- Ajutoornermik kinguneqarsinnaasumik iliuuseqarneruvoq, Verner Hammeken tusarniaarnermut akissummi atsiorsimasoq erseqqissaavoq.

Frank Rasmussen navianartunik naliliisimanermut akerliulluinnarpoq, oqaatigalugulu Verner Hammekenip nunani allarpassuarni illoqarfiit misissuiffigiinnarsinnaagai, taakkunanimi ikuallaaviit umiarsualivinni inuussutissanik qerisunillu usigiaasarfiusut qanittuanni inissisimammata.

Umiarsualivik allilerneqarsinnaasoq

Frank Rasmussenip aamma erseqqissaatigaa, umiarsualiviup siunissami allilerneqarnissaa pisariaqartinneqalissappat alliliinissamut ernumassutissaqartoqanngitsoq.

- Umiarsualiviummi annertuumik allilerneqarsinnaanerata pilersaarummut ilanngunneqarnissaa qulakkeersimavarput, eqqagassalerisut pisortaat erseqqissaavoq.

Taassuma ilisimatitsissutigaa, Sikuki Harbour aamma Royal Greenland oqaasissaminnik eqqarsaatiginnilluarnerusimallutik ajornartorsiutaalersinnaasutut eqqumaffigisassanik tikkuussisimasut.

- Sikuki Harbourimit siusinnerusukkut oqaatigineqarsimavoq umiarsualivimmi inissaqarluartoq, aamma umiarsualiviutileqatigiiffik isertitaqartartussaammat, ikuallaavissap Qeqertami naaralaartitsiviusumiinnissaa ajoriffissaqartinngikkitsik, Frank Rasmussen erseqqissaavoq.

Akerliusoqangaatsiassasoq

Eqqagassalerisut pisortaata ilisimatitsissutigaa, ukiualuit matuma siornatigut Ikuallaavissap Isertitsiviup nutaap eqqaanut inissinneqarsinnaanera eqqarsaatigineqarsimasoq.

- Taamanikkut takusinnaasimavarput Nuummi innuttaasunit tamanna akerlerineqangaatsiassaasoq, sumiiffimmi alianaatsorsuaq ujakkaarluni sisorartartut qamuteralannillu angalaartartut aallarfigisarpaat, Frank Rasmussen oqarpoq, nangillluni oqaatigalugu iluallaavimmit kissarneq sinneruttoq atuisunut ungasippallaassasoq, taamalu suliniummut akitsorsaataassalluni.

120 mio. koruuninik akisunerulissasoq

- Isertitsiviup nutaap eqqaani allamik umiarsualiviortoqassapput 120 millioner koruunit missaannik akeqassaaq. Suliniut maanna ingerlanneqartoq tamatuma annertuumik akisunerulersissavaa, inissiffissatullu aalajangiunneqarsimasoq malillugu suliaqarnerput katillugit 200 millioner koruuninik akeqarpoq, Frank Rasmussen ilisimatitsivoq.

Nutaarsiassat

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...