Eqqagassalerinermi pilersaarutit pillugit borgmester suli mianersorpoq
Eqqagassalerinermut neqeroorusiaq takoqqaarlugu periarfissallu eqqartoqqaarlugit, ESANI Avannaata Kommuniani kiffartuussilissanersoq aatsaat aalajangerneqassaaq.
Kommunit eqqaaveqarnermut tunngatillugu suleqatigiiffiat, ESANI A/S, Avannaata Kommuniani sullissilissanersoq suli qulakkeerlugu oqaatigineqarsinnaanngilaq.
Kommuni kiffartuussinissamut isumaqatigiissummut neqeroorummik suli tunineqarsimanngilaq, kiffartuussinerillu suusinnaanersut taakkulu naligi suli tusarfigisimanagit. Avannaata Kommuniani borgmester Palle Jerimiassen (att.) taama erseqqissaateqarpoq. Ilanngullugulu oqaatigaa kiffartuussinissamut neqeroorutigineqartut kommunalbestyrelsemit akuerineqarsinnaanngippata, aaqqiissutissanik allanik kommuni ujartuissasoq.
- Kiffartuussinissamut isumaqatigiissummut neqeroorut tigusimaleriarutsigu, soorunami kommunalbestyrelsemit oqaluuserineqassaaq naliliiffigineqarlunilu. Isumaqatigiissummik atsiugassamik suli takunngilagut, borgmester Palle Jerimiassen oqarpoq erseqqissarlugulu kommunip neqeroorut isumaliutersuutigilersimagaa Kommune Qeqertalimmi borgmesterip kiffartuussinissamut periarfissanik ujartuisoqarsinnaanera pillugu ilisimatitsineratigut.
ESANI A/S-ip Avannaata Kommuniani eqqagassalerinermi kiffartuussinissamut isumaqatigiissuteqarnissamut neqeroornissamik akuersisimanera pillugu Sermitsiaq.AG sapaatip akunnerani aallartittumi allaaserinnereersorlu, borgmesteri oqaaseqarpoq.
Kiffartuussineq utaqqiisaagallartumik aaqqiissutaassaaq
Avannaata Kommunia eqqagassalerinermi nammineq suliaqassalluni aalajangiusimavoq. Kommuni kommunit eqqagassalerinermik ingerlatseqatigiiffianik ESANI A/S-imik piginneqataanngillat, kommunilu nammineerluni illoqarfimini sisamaasuni eqqagassanik ikuallaavinnik sanaartussalluni aningaasanik nassaarniarluni siunnerfeqarpoq.
Avatangiisinut naalakkersuisoqarfimmut eqqakkanik silami ikuallaanissamut immikkut akuersissummik qinnuteqarnera kingullermik itigartinneqarsimavoq. Naalakkersuisoqarfiummi piumasaraa kommunip eqqagassalerinermi pilersaarutini naalakkersuisoqarfimmut saqqummiutissagai. Nunatsinni eqqakkani silami ikuallaasarneq 2024-mi inerteqqutaalissaaq.
Palle Jerimiassen nassuiaavoq kommunip eqqagassalerinerup iluani siunissamut ungasinnerusumut pilersaarutini Avatangiisinut Naalakkersuisumut, Kalistat Lundimut (IA) saqqummiutissallugit piareersimasoq.
- Soorunami siunissaq ungasinnerusoq eqqarsaatigalugu pilersaaruteqarpugut. Tamakkuli aningaasanik naleqarput, eqqakkallu piujunnaartinniarlugit suliaqalernissamut, illoqarfitsinni sisamaasuni nunaqarfitsinnilu 21-usuni piareersarnissamut piffissamik pisariaqartitsivugut. Eqqagassalerinermik piujunnaartitsisarnissamut suliniutigut kommunimi najugaqarfiutitsinnut tulluarsakkat, nunatsinnilu suliarineqartut, ingerlatissavagut, Palle Jerimiassen Sermitsiaq.AG-mut oqarpoq.
ESANI A/S-ip pisortaa Frank Rasmussen Sermitsiaq.AG-mut ilisimatitsereerpoq kiffartuussinissamut isumaqatigiissutissamut siunnersuut neqeroorutinik imaqartoq sapaatit akunneri marluk qaangiutsinnagit naammassereersimassasoq.