Eqqaavissuarmi ikuallattoqaraluartoq Uummannami imeq imerneqarsinnaavoq

Akuutissat takornartat nassaarineqarnikuugaluartut imeq imerneqarsinnaavoq

Nukissiorfiit maannakkut imermik misissuinernut akissutigineqartut tigusimalerpai, tassa taakku Uummannami eqqaavissuup nammineerluni ikuallalernerata kingornatigut misissugassatut qaluneqartut. Misissugassat Hollandimi laboratoriami misissoqqissaarneqartut takutippaat Uummannami imeq imerneqartussaq imissallugu suli aarlerinaateqanngitsoq.

Misissueqqissaarnerit inernerisa takutippaat akuutissat ataasiakkaat imaluunniit akuutissat ataatsimoortut malugineqarsinnaasut, taakkua tatsini imermik imerneqartussamik sillimmateqarfinni nalinginnaasumik takusaassusaanngillat, kisianni taakkua ima annertutiginngillat erngup imerneqartussap pitsaassusia aarleqqutigisariaqarluni. Nunatta Nakorsaanera Henrik L. Hansen Nukissiorfinnut aamma Pinngortitamut Avatangiisinullu Naalakkersuisoqarfimmut ilisimatitsivoq akuutissat imermi nassaarineqartut peqqissutsimut akornutaasinnaanngitsut.

Nukissiorfinnit misissugassanik nalinginnaasumik qalusisarnermut pilersaarutip saniatigut erngup pitsaassusiata suli nakkutigineqarnissaanut pilersaarut aallartinneqarpoq. Tamatuma saniatigut augustip aallartinnerani imermik misissugassamik qalusisoqassaaq tassani misissorniarlugu, akuutissat imermiittussaanngitsut qaffasissusiat allanngorsimanersoq tassa tatsimi sikup aareersimanerata kingorna.

Nukissiorfiit qilanaaraat piaarnerpaamik Uummannami eqqakkanik passussisarnermi atorsinnaasumik aaqqiisoqarnissaa, taamaaliornikkut erngup imerneqartussap imerneqarnissaa suli isumannaatsuuinnaqqullugu.

Powered by Labrador CMS