Eqqaavissuaq ikuallattoq qaminneqangajalerpoq

Ilulissani eqqaavissuaq ikuallattoq sisamanngormat ullaakkut qaminneqangajalersimavoq, politiit ilisimatitsipput

Politiit qatserisartullu, Ilulissani eqqaavissuaq pingasunngormat ikuallammat, arlaliullutik takkupput.

Ikuallattoq ulorianartumik pujuliorpoq, kommunilu tankit nappartallu qaartoortitsisarmata, innuttaasut qanillinaveersaarnissaannik kaammattuivoq.

Ssisamanngormalli ullaakkut ikuallattoq aqunneqarsinnaanngorsimavoq, politiinit oqaluttuarineqarpoq:

- Arfineq-marlunngulersoq nalunaarutigineqarpoq ikuallanneq qaminneqarluinnalersoq, maannalu taamaallaat nakkutigineqarlunilu qamisarluarneqartoq.

Ikuallaqqilersinnaasoq

- Suli imermik serpartartarpaat, qamisaanerli annikilliartortinneqarluni, Kalaallit Nunaanni Politiit pigaartuisa pisortaat Aqqalu Petersen oqarpoq.

Pigaartut pisortaat naapertorlugu ikuallattoq ikummarisseqqissinnaavoq, taamaammallu qamivissimasutut oqaatigissallugu siusippallaarpoq.

Politiit ikuallanneq qanoq pilersimanersoq suli oqaatigisinnaanngilaat.

Powered by Labrador CMS