Skip to main content

Eqqaaniut: Finn Lynge

Inuk kissalaartoq, ikinngutigilluagaq suleqatigilluagarlu akornatsinniikkunnaarpoq. Finn Lynge tallimanngormat Qaqortumi angerlarsimaffimmini toquvoq. Mads Fægteborgip Finn Lynge eqqaaniarpaa

Finn Lynge 22. april 1933 - 4. april 2014 - Mads Fægteborg, Stubbekøbing, allappoq:
´Finn Lyngelu immitsinnut ilisarisimalerput 1985-imi upernaakkut, taamanikkut Inuit Circumpolar Conference Environmental Commission-imi suleqatitut atorfinitsimmanga. Finn Lyngep issittumi avatangiisinut periusissaq ataqatigiissarniarsimavaa - suil tamakku eqqarsastigineqaqqajanngikkallarmata.
Suleqatigiinnerput 9-17-imut sulinerinnaanngilaq - ´piffissaq tamaat´ ´tamakkiisumillu´ sulisarsimavugut. Angusagullumi aamma pingaaruteqalerput, tassa Moskvami Kreml-imiimmat Mikhael Gorbatjov, nunarsuarmi ingerlatsinermik nutaamik kissaatilik. Taamaattumik nunarsuarmi tamarmi sovjet-ip aallatitaqarfii ujarleqquneqarput nunamut nittarsaataasinnaasunik. Danmarkimi ambassadep allattaata avatangiisinut kommissioneerarput nassaaraa, Finn-illu eqqaamasalikkersaarummini Etlangt liv på tvær -ip aappaani allanneratut ´kilitsissiarpalaartumik´ nereqatigeereerluta, ambassademi allatsip avatangiisinut periusissatut missingersuusiarput aallartitaqarfimmukaappaa. Tamanna eqqarsaatigeqqinngilarput, taavali Gorbatjov-ip 1987-imi oktobarimi Murmanskimi oqalugiaataa takuarput, atualeriallaratsigulu issittumi suleqatigiinneq, nunat inoqqaavi avattangiisillu pillugit oqaasii missingersuusiatsinnit oqaasertai taakkorpiangajaat atorlugit oqalugiarsimasoq.  Gorbatjovip oqalugiaataa nunat allamiut sunniiniarnerinnartut tunuartippaat, taamaasillunilu Sovjetunion-iunngitsoq, Finlandili, nunat tamalaat issittumi suleqatigiinnerannik aallartitsisuuvoq.
Finn inuk uppertuuvoq katuullitullu palasiulluni, palasiuninili unitsippaa allamik sammisaqalerami. ´Mads, maanna katuulinngorpunga paaveqanngitsoq´, Finnip ukiualunnguit qaangiuttut oqarfigaanga, Ruumami paavitoqaq qanganitsanut uteqqikkusuttoq qatsukkamiuk.
Finn siullersaalluni kisiartaallunilu Kalaallit Nunaat sinnerlugu Europaparlamentimut ilaasortaasimavoq, nunani 1979-imiit 1985-imi aninissaata tungaanut tassani sullillugu. Quiasaarutinik allattartoq Per Danker qinersinissaq sioqqullugu allappoq: ´Finn Lynge EF-imut iserniarpoq EF-imit aniniarluni - Agnerlarsimaannaruni pitsaanerunngila?´
Naamik, Finn uninngaannarniartuunngilaq. Inuiaqatigiinnut tunniusimanerujussua pissutigalugu, soorlu ilaatigut takuneqarsinnaasoq allaaserisarpassuisigut ilaatigullu atuakkiaatigut ´Tanker i et bulldozerspor´, ´Kampen om de vilde dyr´, ´Selvstændighed for Grønland?´, ´Det vanskelige tango´, ´vad nu?´, minnerunngitsumillu eqqaamasalikkersaarutai marluk, Finn Kalaallit Nunaata avaterujussuani allaat oqalugiartussatut piumaneqarluartarsimavoq.
Finnip ikinngutigilluagaasa marlussuit Finn nersorniarlugu atuakkiorput. Taassuma aqqa ´Menneskesjæl´, ukiorpassuarni ikinngutigilluakkamut naleqqunnerusinnaanngilaq, maanna anerningersimasumut arsarnerillu avannaaniilersimasumut.
Asasara Finn, ilaquttanit ikinngutinillu maqaasineqalereerputit! Qimatai misiginneqatigaakka!
 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER