Eqqaaniaaneq: Kim unneqqarissuugami ataqqineqartuuvoq
Borgmesteri Kiista P. Isaksen. kommunimi pisortap Kim Dahlip sapaatiummat unnuakkut toqukkut qimagunneranut atatilligu Kommuni Kujallermi kommunalbestyrelsi sinnerlugu eqqaaniaavoq.
Angut innuttaasunut qinikkanullu tunniusimalluarluni sullissisoq akornatsinniikkunnaarpoq.
Angut inoqatiminut asannittoq, tamanut inissaqartitsisoq, ikinngutaalluartoq, unneqqarissumik ingerlatsisoqarnissaanik pingaartitsisoq Kim Dahl, Kommune Kujallermi innuttaasunut qinikkanullu tunniusimalluarluni sullissilluartoq annaavarput.
Kimmip ilisarisimaleqqaarneraniilli inuppalaartuunera, nunamut tunngalluinnarluni
tusarnaallaqqissuunera, inoqatiminullu ataqqinnilluni tamanut inissaqartitsilluni
sullisserusuttuunera takusinnaanikuuara. Taamaattuugami tamanit ataqqineqarluni
suleqatigineqarsinnaavoq.
Kimmi isumaginninnermut siunnersortitut ilinniarsimavoq, ilinniakkanilu atorlugu Qaqortup kommunerisimasaani sulilluarluni sulisimalluni. Kingorna Kommune Kujallermi allatoqarfimmi pisortatut sulereerluni pisortaanertut sulilerluni.
Kimmip kommunitta iluani innuttaasut qinikkallu pitsaasumik sullinneqarnissaat pingaartitaraa. Inuk ulapittuugaluarluni sulisut innuttaasullu saaffiginnissutaat suulluunniit pisarnermisut kiinnerluarluni qisuariarfigisarpai. Suliassallu suugaluarpataluunniit unneqqarissumik sullisineq pingaartilluinnarlugu suliap suliarineqarnissaanik qulakkeerinniniartarnini ilisarnaatigaa.
Tamanna piffissami kingullermi kommunip pisortaaneratut sulinermini nukippassuit atorlugit ersersinniartaraa qanimut suleqataasugut ilisimaarilluinnarparput. Kimmip oqariartuutigisarpaa unneqqarissumik sulineq ingerlanneqartillugu sumilluunniit ernumassutissaqanngitsugut, ilumoortorlu sukkulluunniit aqqutissaajuaannarmat sulinerput ingerlatiinnassagipput.
Unneqqarissumik sulinissamik pingaartitsinera ingerlateqqillugu suliassagut ingerlateqqissavagut, allaffianilu iseruminartumi sulisoq iserfigeqqissinnaajunnaaraluarlugu inuunermi sulinermilu tunniussarpassui ilinniarfigilluarsimasagut inuiaqatigiinnut ingerlateqqillugit sullissineq ingerlateqqinneqassaaq.
Kimmi sulisuminut inuiaqatigiinnullu tamanut tunniusimalluinnartuugaluarluni ilaquttaminut annertuumik pingaartitsinera malunnartuaannarpoq. Allaffianummi iserfigalugu nuliata, meeraasa ernutaatalu assii takunngitsuugassaanngillat. Taakkuuppullu sulinermini nukippassuarnik annertuumik aallerfigisartagai.
Kimmip nulia kinguaavisalu annaasaqarneranni misiginneqatigingaarpakka.
Kimmip siuisippallaamik qimagunnerani annaasaq annertoqaaq, maqaasissaqaarput,
eqqarsaatitsigulli ilagiuarumaarparput.
Sulerusussuseqarnermini nunatsinnut innuttaasunullu tunniussimasai ataqqillugit qujaniarlutalu eqqaamasassaraagut.
Kimmip eqqaaneqarnera ataqqinartuuli.
På vegne af kommunalbestyrelsen, Kiista P. Isaksen